తంగళ్ళపల్లిలో షార్ట్ సర్క్యూట్‌తో ఫ్రిజ్ పేలుడు

 రూ.90 వేల నగదు బూడిద

తంగళ్ళపల్లి,(విజయక్రాంతి): రాజన్న సిరిసిల్ల జిల్లా తంగళ్ళపల్లి మండల కేంద్రంలోని ఇందిరానగర్ కాలనీలో గురువారం జరిగిన అగ్నిప్రమాదంలో పెను ప్రమాదం తప్పింది. ఇంట్లో షార్ట్ సర్క్యూట్ కారణంగా రిఫ్రిజిరేటర్ ఒక్కసారిగా పేలిపోవడంతో ప్రాంతంలో భయాందోళన నెలకొంది. ఘటనలో ఎలాంటి ప్రాణనష్టం జరగకపోవడం ఉపశమనకరమైన విషయం కాగా, ఆస్తి నష్టం మాత్రం గణనీయంగా జరిగినట్లు తెలుస్తోంది.

బాధిత ఇంటి యజమాని బిక్షపతి తెలిపిన వివరాల ప్రకారం, రిఫ్రిజిరేటర్ నుంచి అకస్మాత్తుగా దట్టమైన పొగలు రావడం ప్రారంభమైంది. కుటుంబ సభ్యులు గమనించేలోపే పెద్ద శబ్దంతో ఫ్రిజ్ పేలిపోయింది. వెంటనే అప్రమత్తమైన కుటుంబ సభ్యులు బయటకు పరుగులు తీయడంతో ప్రాణాపాయం తప్పింది. అయితే ఫ్రిజ్ పక్కనే భద్రపరచిన సుమారు రూ.90 వేల నగదు మంటల్లో కాలిపోయినట్లు బాధితుడు ఆవేదన వ్యక్తం చేశారు. ప్రమాదం జరిగిన వెంటనే స్థానికులు సంఘటనా స్థలానికి చేరుకుని మంటలను అదుపులోకి తెచ్చారు. ఈ ఘటనకు సంబంధించిన పూర్తి వివరాలు ఇంకా తెలియాల్సి ఉంది. విద్యుత్ శాఖ అధికారులు సంఘటనా స్థలాన్ని పరిశీలించి ప్రమాదానికి గల ఖచ్చిత కారణాలను తెలుసుకోనున్నట్లు సమాచారం.