కాంగ్రెస్ తీరుపై దేశవ్యాప్తంగా బీజేపీ నిరసనలు

న్యూఢిల్లీ: యువజన కాంగ్రెస్ కార్యకర్తల(Youth Congress workers) తీరుపై దేశవ్యాప్తంగా నిరసనలు కొనసాగుతున్నాయి. ఇండియా ఏఐ ఇంపాక్ట్ సమ్మిట్2026లో శుక్రవారం కాంగ్రెస్ కార్యకర్తలు చొక్కాలు విప్పి ఆందోళన చేశారు. భారత్- అమెరికా మధ్య కుదిరిన వాణిజ్య ఒప్పందానికి వ్యతిరేకిస్తూ నిరసన చేపట్టారు. ఢిల్లీలో యువజన కాంగ్రెస్ కార్యకర్తల నిరసనను బీజేవైఎం శ్రేణులు ఖండించారు. గాంధీభవన్ ముట్టడికి బీజేవైఎం పిలుపుతో గాంధీభవన్, బీజేపీ రాష్ట్ర కార్యాలయం వద్ద భారీగా పోలీసులు మోహరించారు.

గాంధీభవన్(Gandhi Bhavan) ముందు బీజేవైఎం నేతలు నిరసనకు ప్రయత్నించారు. రంగంలోకి దిగిన పోలీసులు బీజేవైఎం నేతలను(BJYM leaders) అడ్డుకుని అరెస్ట్ చేశారు. యూత్ కాంగ్రెస్ నిరసనపై బీజేపీ పాలిత రాష్ట్రాల్లో బీజేపీ కార్యకర్తలు కాంగ్రెస్ పార్టీకి వ్యతిరేకంగా నిరసన తెలిపారు. కాషాయ పార్టీ సభ్యులు, నాయకులు ఈ చర్యను సిగ్గుచేటని విమర్శించారు. కాంగ్రెస్ అగ్ర నాయకుడు రాహుల్ గాంధీ(Rahul Gandhi), పార్టీ నాయకత్వం క్షమాపణ చెప్పాలని డిమాండ్ చేశారు. న్యూఢిల్లీ, ఢిల్లీలోని పాటియాలా హౌస్ కోర్టు వద్ద యువజన కాంగ్రెస్ కార్యకర్తలను హాజరుపరిచే ముందు భారీ భద్రతను మోహరించారు.

ఢిల్లీలో జరిగిన ఇండియా ఏఐ ఇంపాక్ట్ సమ్మిట్‌లో(India AI Impact Summit) యూత్ కాంగ్రెస్ షర్ట్‌లెస్ నిరసన భారత్ కు అవమానమని అస్సాం బీజేపీ అధ్యక్షుడు దిలీప్ సైకియా శనివారం ఖండించారు. ఇది రాహుల్ గాంధీ ప్రత్యక్ష సూచన మేరకు జరిగిందని పేర్కొన్నారు. ఈ సంఘటనపై సమగ్ర దర్యాప్తు జరపాలని డిమాండ్ చేశారు. కాంగ్రెస్ వికారమైన ముఖాన్ని బహిర్గతం చేయడానికి బీజేపీ, దాని యువజన విభాగాలు రాష్ట్రవ్యాప్తంగా నిరసనలు నిర్వహిస్తాయని చెప్పారు. విలేకరుల సమావేశంలో సైకియా మాట్లాడుతూ, "ఇది మాకు జాతీయ అవమానం, ప్రపంచవ్యాప్తంగా అవమానకరమైన క్షణం. ఇది కాంగ్రెస్ దేశ వ్యతిరేక వైఖరిని చూపిస్తుంది" అని పేర్కొన్నారు.