పత్తర్‌కండి/హైలకండి: పశ్చిమ బెంగాల్‌లో మార్పు అనివార్యమని కేంద్ర హోం మంత్రి అమిత్ షా(Union Home Minister Amit Shah) మంగళవారం ఉద్ఘాటించారు. రాష్ట్రంలో బీజేపీ అధికారంలోకి వచ్చిన వెంటనే, చొరబాటుదారులందరినీ వారి స్వదేశాలకు వెనక్కి పంపిస్తామని తెలిపారు. పథర్‌కండిలో జరిగిన ఒక ఎన్నికల సభను ఉద్దేశించి మాట్లాడుతూ, కాంగ్రెస్ పార్టీ అస్సాంలోని బరాక్ లోయలో అక్రమ వలసదారులకు ఆశ్రయం కల్పించిందని, తద్వారా శ్రీభూమి, సిల్చార్ మరియు కచార్ జిల్లాల్లో వారిని ఆధిపత్య స్థానంలో నిలిపిందని ఆరోపించారు. ఈ చట్టం వల్ల రాష్ట్రంలో ఎటువంటి చొరబాటుదారులు మిగిలి ఉండరని తెలిసే, కాంగ్రెస్ పౌరసత్వ సవరణ చట్టాన్ని (CAA) వ్యతిరేకిస్తోందని షా ఆరోపించారు.

భారతదేశం ఒక ధర్మశాల కాదని పేర్కొంటూ, ఈ దేశంలో చొరబాటుదారులకు చోటు లేదని అమిత్ షా స్పష్టం చేశారు. కాంగ్రెస్ చొరబాటుదారుల సహాయంతో తిరిగి అధికారంలోకి రావాలని కోరుకుంటోందని ఆయన ఆరోపించారు. అయితే, "తన మూడు తరాలు కలిసినా అసోంను చొరబాటుదారుల నేలగా మార్చలేవని రాహుల్ బాబా తెలుసుకోవాలి" అని  అమిత్ షా తెలిపారు. హైలకండిలో జరిగిన మరో బహిరంగ సభలో ప్రసంగిస్తూ షా, అసోంలో ముస్లిం విద్యార్థుల కోసం కాంగ్రెస్ 700 మదర్సాలను నిర్మించిందని, అయితే వారు కూడా ఆధునిక విద్యను పొందే వీలు కల్పించేందుకు బీజేపీ వాటిలో 402 మదర్సాలను ప్రాథమిక పాఠశాలలుగా మార్చిందని పేర్కొన్నారు.