నేపాల్‌లో భోటేకోశీ నది ఉగ్రరూపం.. 8 మంది 'జలసమాధి'

నేపాల్‌లో భారీ ఆకస్మిక వరదలు

ఖాట్మండు: నేపాల్‌లో భారీ ఆకస్మిక వరదలు(Nepal Flash Flood Disaster Causes Damage) బీభత్సం సృష్టిస్తున్నాయి. నేపాల్‌లోని కొన్ని ప్రాంతాలను మంచు, రాళ్ల కొండచరియలు విరిగిపడటం వల్ల సంభవించిన భారీ ఆకస్మిక వరదల కారణంగా వందలాది మంది గల్లంతయ్యారు. ఈ ఘటనలో కనీసం ఎనిమిది మంది మరణించగా, గ్రామాలు, మౌలిక సదుపాయాలకు తీవ్ర నష్టం వాటిల్లింది. ఉత్తర నేపాల్ లో భోటేకోశీ నది(Bhote Koshi River) ఉగ్రరూపం దాల్చింది. ఆకస్మిక వరదల్లో 26 మంది పోలీసులు, ఏడుగురు సాయుధబలగాల సిబ్బంది గల్లంతయ్యారు. టిబెట్ వైపు నుంచి వరద ప్రవాహం ముంచెత్తింది. భారీ వరదల్లో పలు గ్రామాలు కొట్టుకుపోతున్నాయి. వరదలకు 6 జల విద్యుత్ కేంద్రాలు, సబ్ స్టేషన్లు ధ్వంసం అయ్యాయి. ఆకస్మిక వరదలకు ఉత్తర నేపాల్ లో విద్యుత్ సరఫరా నిలిచిపోయింది. 12 హెలికాప్టర్లు వరద సహాయ చర్యల్లో పాల్గొన్నారు. వరదల్లో చిక్కుకున్న వారిని పోలీసులు రక్షించారు.

384 మందికిపైగా పర్యాటకులు గల్లంతు

అకస్మాత్తుగా వచ్చిన వరదల కారణంగా, భారత్, అమెరికా, బ్రిటన్, మలేషియా వంటి దేశాలకు చెందిన 291 మందితో సహా మొత్తం 384 మంది పర్యాటకులు గల్లంతయ్యారని అధికారులు తెలిపారు. వరదలతో నేపాల్‌లోని పలు జిల్లాల ప్రజలను అప్రమత్తం చేసిన అధికారులు, భోటెకోషి, త్రిశూలి, నారాయణి నదుల తీరాలకు దూరంగా ఉండాలని హెచ్చరించారు. రక్షణ చర్యల్లో తమకు సహాయం చేయాలని భారత్, చైనా రెండింటినీ కోరామని నేపాలీ ప్రభుత్వ ప్రతినిధి సస్మిత్ పోఖరేల్ పేర్కొన్నారు. భారీ వరదల వీడియోలు సోషల్ మీడియాలో వైరల్ అవుతున్నాయి.

అత్యంత తీవ్రంగా ప్రభావితమైన రసువా జిల్లాలో గత ఏడాది ఆగస్టులో పొరుగున ఉన్న టిబెట్‌లోని పర్వత ప్రాంతంలో అధిక ఉష్ణోగ్రతల కారణంగా ఒక హిమానీనద సరస్సు పొంగిపొర్లినప్పుడు సంభవించినటువంటి ఆకస్మిక వరదలు సంభవించాయి. ఆ సమయంలో తొమ్మిది మంది ప్రాణాలు కోల్పోగా, రెండు దేశాలను కలిపే వంతెనతో సహా కీలకమైన మౌలిక సదుపాయాలు దెబ్బతిన్నాయి. కాఠ్మండులోని ఇంటర్నేషనల్ సెంటర్ ఫర్ ఇంటిగ్రేటెడ్ మౌంటెన్ డెవలప్‌మెంట్‌కు చెందిన వాతావరణ నిపుణులు, ఒక హిమానీనదం నుండి విరిగిపడిన హిమసంపాతం బుధవారం నాటి ఆకస్మిక వరదకు కారణమై ఉండవచ్చని తెలిపారు.