కోల్‌కతాలో ఈడీ దాడులు.. ఐ-ప్యాక్ చీఫ్ ఇంటికి మమత

కోల్‌కతా: పశ్చిమ బెంగాల్‌లోని కోల్‌కతాలో రాజకీయ కన్సల్టెన్సీ గ్రూప్ I-ప్యాక్ పై ఎన్‌ఫోర్స్‌మెంట్ డైరెక్టరేట్ (ED) గురువారం దాడులు నిర్వహించింది. మనీలండరింగ్ కేసుకు సంబంధించిన దర్యాప్తులో భాగంగా గ్రూప్ I-ప్యాక్ అధిపతి ప్రతీక్ జైన్ కు సంబంధించిన కోల్‌కతా సహా పలు ప్రాంతాల్లో ఈడీ తనిఖీలు నిర్వహించింది. దాడులు జరిగిన సమయంలో ప్రతీక్ జైన్ ఇంటికి ముఖ్యమంత్రి మమతా బెనర్జీ, కోల్‌కతా పోలీసు కమిషనర్ మనోజ్ వర్మ హఠాత్తుగా వెళ్లడంతో హై డ్రామా చెలరేగింది. ఈ సందర్భంగా మమతా బెనర్జీ మాట్లాడుతూ... అధికారులు తన పార్టీ తృణమూల్ కాంగ్రెస్ (TMC) హార్డ్ డిస్క్‌లను అలాగే అంతర్గత పత్రాలు, సంస్థాగత డేటాను స్వాధీనం చేసుకునేందుకు ప్రయత్నించారని ఆమె ఆరోపించారు.

పార్టీ ఐటీ చీఫ్‌గా ఉన్న జైన్ నివాసంలో జరిగిన ఈడీ దాడి రాజకీయ ప్రేరేపితమైనదని, రాజ్యాంగ విరుద్ధమైనదని బెనర్జీ అన్నారు. అసెంబ్లీ ఎన్నికలకు మా అభ్యర్థుల వివరాలు ఉన్న మా పార్టీ పత్రాలు, హార్డ్ డిస్క్‌లను వారు స్వాధీనం చేసుకున్నారని, వాటిని తను తీసుకువచ్చినట్లు ఆమె వెల్లడించారు. రాజకీయ పార్టీల డేటాను సేకరించడం ఈడీ విధినా?” అని ముఖ్యమంత్రి అడిగారు. టిఎంసికి రాజకీయ సలహాలతో పాటు, ఐ-ప్యాక్ పార్టీ ఐటి, మీడియా సెల్‌ను కూడా చూసుకుంటుందని, గురువారం ఉదయం నుండి సోదాలు జరుగుతున్న ఇక్కడి లౌడాన్ స్ట్రీట్‌లోని జైన్ నివాసం నుండి బయటకు వచ్చిన తర్వాత బెనర్జీ ఈ ఆరోపణలు చేశారు.

జైన్ అధిపతిగా ఉన్న కన్సల్టెన్సీ సంస్థ ఇండియన్ పొలిటికల్ యాక్షన్ కమిటీ (ఐ-ప్యాక్) కార్యాలయంలో కూడా సోదాలు జరుగుతున్నాయి. అధికార పార్టీ అంతర్గత వ్యూహం, అభ్యర్థుల జాబితాలు, గోప్యమైన డిజిటల్ మెటీరియల్‌ను ED యాక్సెస్ చేయడానికి ప్రయత్నిస్తోందని పేర్కొంటూ, అటువంటి సమాచారానికి ఎటువంటి ఆర్థిక దర్యాప్తుతో సంబంధం లేదని బెనర్జీ వ్యాఖ్యానించారు. ఈ ప్రక్రియను బెదిరింపు చర్యగా అభివర్ణిస్తూ ఇది రాజకీయ ప్రతీకారమని, హోంమంత్రి దేశాన్ని రక్షించే వ్యక్తిలా కాకుండా అత్యంత నీచమైన హోంమంత్రిలా ప్రవర్తిస్తున్నారని ఆమె ఆగ్రహం వ్యక్తం చేశారు.