భారత్‌కు వియత్నాం బోటు ప్రమాద మృతదేహాలు

హనోయి: వియత్నాంకు(Vietnam Boat Accident) చెందిన ఫు క్వోక్ ద్వీపం(Phú Quốc) సమీపంలో జరిగిన స్పీడ్‌బోట్ ప్రమాదంలో మరణించిన 15 మంది భారతీయ పర్యాటకుల మృతదేహాలను(Vietnam boat accident victims) సోమవారం భారత్‌కు తరలించనున్నట్లు హనోయిలోని భారత రాయబార కార్యాలయం తెలిపింది. మృతదేహాలను హో చి మిన్ సిటీ నుండి ముంబైకి వియత్నాం ఎయిర్‌లైన్స్ విమానం VN979లో తరలిస్తారు.

"ఈ విమానం స్థానిక కాలమానం ప్రకారం సాయంత్రం 6 గంటలకు హో చి మిన్ సిటీ నుండి బయలుదేరి, రాత్రి 9:35 గంటలకు (IST) ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయానికి (Chhatrapati Shivaji Maharaj International Airport Mumbai) చేరుకుంటుంది" అని రాయబార కార్యాలయం సోషల్ మీడియా పోస్ట్‌లో పేర్కొంది. సంబంధిత రాష్ట్ర ప్రభుత్వాలకు సమాచారం అందించామని, మృతదేహాలను వారి స్వస్థలాలకు తరలించే విషయంలో బాధిత కుటుంబాలతో సమన్వయం చేసుకోవాలని ఆయా ప్రభుత్వాలను కోరామని అధికారులు తెలిపారు. 

బాధితులలో 10 మంది తమిళనాడుకు, ముగ్గురు ఆంధ్రప్రదేశ్‌కు, ఇద్దరు కేరళకు చెందినవారు. మరణించిన వారిలో ఇద్దరు మహిళలు ఉన్నారు. ద్వీప విహారయాత్ర నుండి తిరిగి వస్తుండగా, ఫు క్వోక్ సమీపంలోని హోన్ మే రుట్ న్గోయ్ ద్వీపానికి సుమారు 400 మీటర్ల దూరంలో 32 మంది భారతీయ పర్యాటకులు, నలుగురు వియత్నామీ సిబ్బందితో ప్రయాణిస్తున్న స్పీడ్‌బోట్ బోల్తా పడటంతో శుక్రవారం ఈ ఘోర ప్రమాదం జరిగింది.