చెక్‌మేట్ సమరం.. గుకేశ్‌కు కఠిన పరీక్ష

20-11-2026 | 12:48pm

గుకేశ్‌కు అసలైన పరీక్ష.. సింధరోవ్‌తో వరల్డ్ ఛాంపియన్‌షిప్ పోరు!

ప్రపంచ చెస్‌లో మరో ఆసక్తికర సమరానికి రంగం సిద్ధమైంది. తన ప్రపంచ ఛాంపియన్‌షిప్ టైటిల్‌ను నిలబెట్టుకోవాలని భారత గ్రాండ్‌మాస్టర్ డి. గుకేశ్ పట్టుదలతో ఉండగా.. అద్భుతమైన ఫామ్‌లో ఉన్న ఉజ్బెకిస్థాన్ స్టార్ జావోఖిర్ సింధరోవ్ అతడికి గట్టి సవాల్ విసిరేందుకు సిద్ధమయ్యాడు. వీరిద్దరి మధ్య Salesforce FIDE World Chess Championship పోరు నవంబర్ 24 నుంచి జెనీవాలో ప్రారంభం కానుంది. ఈ పోటీతో చెస్ ప్రపంచం చూపంతా ఈ ఇద్దరు యువ గ్రాండ్‌మాస్టర్లపైనే నిలిచింది.

ఛాంపియన్‌గా గుకేశ్.. టైటిల్ నిలబెట్టుకుంటాడా?

2024లో జరిగిన వరల్డ్ ఛాంపియన్‌షిప్ మ్యాచ్‌లో చైనాకు చెందిన డింగ్ లిరెన్‌ను ఓడించి గుకేశ్ ప్రపంచ ఛాంపియన్‌గా అవతరించాడు. దీంతో అత్యున్నత స్థాయి చెస్‌లో తన ప్రతిభను మరోసారి నిరూపించుకున్నాడు. ఇప్పుడు డిఫెండింగ్ ఛాంపియన్‌గా బరిలోకి దిగుతున్న అతడికి టైటిల్‌ను కాపాడుకోవడం మరో పెద్ద సవాల్‌గా మారింది. ప్రత్యర్థి కూడా సాధారణ ఆటగాడు కాకపోవడంతో ఈసారి పోరు మరింత ఉత్కంఠభరితంగా ఉండనుంది. మరోవైపు జావోఖిర్ సింధరోవ్ ప్రస్తుతం అద్భుతమైన ఫామ్‌లో ఉన్నాడు. World Cupతో పాటు Candidates Tournamentలోనూ విజయాలు సాధించి టైటిల్ పోరుకు అర్హత సంపాదించాడు. వరుస విజయాలతో ఆత్మవిశ్వాసంతో ఉన్న అతడు గుకేశ్‌కు గట్టి పోటీ ఇవ్వడం ఖాయంగా కనిపిస్తోంది. ప్రపంచ ఛాంపియన్‌ను ఓడించి కొత్త చరిత్ర సృష్టించాలనే లక్ష్యంతో సింధరోవ్ బరిలోకి దిగనున్నాడు.

రేటింగ్స్‌లోనూ భారీ తేడా!

ఈ పోరులో మరో ఆసక్తికర అంశం ఇద్దరి FIDE Ratings. ప్రస్తుతం గుకేశ్ 2710 రేటింగ్ పాయింట్లతో ప్రపంచ ర్యాంకింగ్స్‌లో 26వ స్థానంలో ఉండగా.. సింధరోవ్ 2782 పాయింట్లతో నాలుగో స్థానంలో కొనసాగుతున్నాడు. అంటే ఇద్దరి మధ్య ఏకంగా 72 పాయింట్ల వ్యత్యాసం ఉంది. ర్యాంకింగ్స్‌లో సింధరోవ్ పైచేయిగా కనిపిస్తున్నప్పటికీ, ప్రపంచ ఛాంపియన్‌షిప్ మ్యాచ్‌లో అనుభవం, ఒత్తిడిని ఎదుర్కొనే సామర్థ్యం, వ్యూహాలే కీలకం కానున్నాయి. మొత్తానికి ఒకవైపు టైటిల్‌ను నిలబెట్టుకోవాలనే పట్టుదలతో గుకేశ్.. మరోవైపు తన అద్భుతమైన ఫామ్‌ను కొనసాగించి ప్రపంచ ఛాంపియన్‌గా నిలవాలనే లక్ష్యంతో సింధరోవ్.. ఇద్దరి మధ్య పోరు చెస్ అభిమానులకు ఆసక్తికర విందు ఇవ్వనుంది. నవంబర్ 24 నుంచి ప్రారంభమయ్యే ఈ Chess Championship Battleలో చివరకు ఎవరు పైచేయి సాధిస్తారో చూడాలి.

మరిన్ని వార్తలు