కోఠి ఎస్‌బీఐ ఏటీఎం వద్ద కాల్పుల కలకలం

హైదరాబాద్: శనివారం ఉదయం కోఠి ప్రాంతంలోని స్టేట్ బ్యాంక్ ఆఫ్ ఇండియా(State Bank of India) ప్రధాన శాఖ సమీపంలో కాల్పుల ఘటన జరగడంతో బ్యాంక్ స్ట్రీట్‌లో తీవ్ర భయాందోళన నెలకొంది. ఉదయం 7 గంటల ప్రాంతంలో రషీద్ అనే వ్యక్తి నగదు డిపాజిట్ చేయడానికి ఏటీఎం వద్దకు వచ్చినప్పుడు ఈ ఘటన జరిగింది. పోలీసుల ప్రకారం, దుండగులు రషీద్‌ను వెంబడించి కాల్పులు జరిపి, అతని వద్ద ఉన్న రూ.6 లక్షల నగదుతో పారిపోయారు. రషీద్ కాలికి బుల్లెట్ గాయం కావడంతో, అతడిని వెంటనే చికిత్స కోసం ఆసుపత్రికి తరలించారు. సుల్తాన్ బజార్ పోలీసులు సంఘటనా స్థలానికి చేరుకున్నారు. నిందితులను గుర్తించడానికి ఆ ప్రాంతంలోని సీసీటీవీ ఫుటేజీని పరిశీలిస్తున్నారు. తదుపరి దర్యాప్తు కొనసాగుతోంది.