కేంద్రం బిగ్ షాక్.. భారీగా పెరిగిన గ్యాస్ సిలిండర్ ధరలు

న్యూఢిల్లీ: పశ్చిమ ఆసియా సంఘర్షణ కారణంగా పెరుగుతున్న ప్రపంచ ఇంధన ధరలకు అనుగుణంగా, వాణిజ్య ఎల్‌పిజి (LPG)(Commercial LPG Price Hiked) ధర శుక్రవారం నాడు 19 కిలోల సిలిండర్‌పై ఏకంగా రూ. 993 మేర పెరిగింది. ఇది వరుసగా మూడవ నెలలో నమోదైన ధరల పెంపు కావడం విశేషం. హోటళ్లు, రెస్టారెంట్ల వంటి సంస్థలు వినియోగించే 19 కిలోల వాణిజ్య LPG సిలిండర్ ధర, గతంలో రూ. 2,078.50 ఉండగా, ఇప్పుడు ఢిల్లీలో రికార్డు స్థాయిలో రూ. 3,071.5కు చేరింది.

ఏప్రిల్ 1న సిలిండర్‌కు రూ. 195.50 చొప్పున ధరలు చివరిసారిగా పెరిగాయి. అంతకు ముందు, మార్చి 1న 19 కిలోల సిలిండర్‌ ధర రూ. 114.5 మేర పెరిగింది. మూడు విడతల పెంపులో, వాణిజ్య LPG ధరలు రూ. 1,303 మేర పెరిగాయి. గృహ వినియోగ సిలిండర్ ధరలో ఎలాంటి మార్పులేదని కేంద్ర ప్రభుత్వం స్పష్టం చేసింది.  వంట గ్యాస్ (LPG) సిలిండర్ ధరలో గృహ LPG ధరలు చివరిసారిగా మార్చి 7న, 14.2 కిలోల సిలిండర్‌పై రూ. 60 మేర పెంచబడ్డాయి.

ఢిల్లీలో 14.2 కిలోల సిలిండర్ ధర రూ. 913గా ఉంది. ప్రభుత్వ రంగ సంస్థలైన ఇండియన్ ఆయిల్ కార్పొరేషన్(Indian Oil Corporation), భారత్ పెట్రోలియం, హిందుస్థాన్ పెట్రోలియం, అంతర్జాతీయ ప్రమాణాలు, మారకం రేటు ఆధారంగా ప్రతి నెల మొదటి తేదీన ఏటీఎఫ్, LPG ధరలను సవరిస్తాయి. పశ్చిమ ఆసియాలో యుద్ధం ఇంధన సరఫరా గొలుసులకు అంతరాయం కలిగించిన తర్వాత, ప్రపంచ చమురు ధరలు దాదాపు 50 శాతం భారీగా పెరిగాయి. గత ఏడాది మార్చిలో లీటరుకు రూ. 2 తగ్గించినప్పటి నుండి పెట్రోల్, డీజిల్ ధరలు యథాతథంగానే కొనసాగుతున్నాయి. ప్రస్తుతం ఢిల్లీలో లీటరు పెట్రోల్ ధర రూ. 94.72, డీజిల్ ధర రూ. 87.62 గా ఉంది.  వాణిజ్య సిలిండర్ ధర భారీగా పెరగడంతో ప్రజలు ఆందోళన వ్యక్తం చేస్తున్నారు.