యాపిల్‌కు టెక్నికల్ షాక్

18-11-2026 | 07:23am

సైబర్ అటాక్ కాదు.. అయినా యాపిల్ సేవలు ఎందుకు ఆగిపోయాయి?

ప్రపంచవ్యాప్తంగా కోట్లాది మంది వినియోగదారులు ఆధారపడే టెక్ దిగ్గజం యాపిల్‌కు ఊహించని సాంకేతిక షాక్ తగిలింది. ఒక అంతర్గత Software Update కారణంగా కంపెనీకి చెందిన కీలక డిజిటల్ సేవలు గంటల తరబడి నిలిచిపోయాయి. App Store, Apple Music, iCloud, Apple Pay వంటి సేవలు పనిచేయకపోవడంతో వేలాది మంది యూజర్లు తీవ్ర ఇబ్బందులు ఎదుర్కొన్నారు. ఒక్క సాఫ్ట్‌వేర్ మార్పు కారణంగా ఇంత పెద్ద వ్యవస్థలో అంతరాయం ఏర్పడటం టెక్ రంగంలో చర్చనీయాంశంగా మారింది. ఈ సమస్యతో చాలామంది యూజర్లు తమ Apple Accounts నుంచి అకస్మాత్తుగా Sign Out అయ్యారు. తిరిగి Login కావడానికి ప్రయత్నించినా ఇబ్బందులు ఎదురయ్యాయి. కొందరికి యాప్‌లు Download కాకపోగా, మరికొందరికి Online Payments పూర్తి కాలేదు. Outage Tracking Platform Downdetectorలో Apple Pay, iCloud సేవలకు సంబంధించి వేల సంఖ్యలో ఫిర్యాదులు నమోదయ్యాయి. దీంతో వినియోగదారులు సోషల్ మీడియాలో తమ సమస్యలను పంచుకున్నారు.

అయితే ఈ పరిణామంపై స్పందించిన Apple సంస్థ ఇది Cyber Attack కాదని స్పష్టం చేసింది. అంతర్గత సాంకేతిక సమస్య వల్లే సేవలకు అంతరాయం ఏర్పడినట్లు తెలిపింది. మంగళవారం సాయంత్రానికి చాలా వరకు సేవలను తిరిగి అందుబాటులోకి తీసుకొచ్చినట్లు వెల్లడించింది. దీంతో యూజర్లకు క్రమంగా ఊరట లభించింది. మరోవైపు యాపిల్‌కు మాత్రమే ఇలాంటి సమస్య ఎదురుకావడం లేదు. ఇటీవల పలు అంతర్జాతీయ సంస్థలు కూడా టెక్నికల్ వైఫల్యాలతో సతమతమవుతున్నాయి. సోమవారం United Airlines సిస్టమ్‌లో ఏర్పడిన లోపంతో 90 నిమిషాలకు పైగా విమానాల రాకపోకలు ఆలస్యమయ్యాయి.

అంతకుముందు అమెరికా Federal Aviation Administration (FAA) నెట్‌వర్క్ సమస్య కారణంగా విమాన కార్యకలాపాలకు అంతరాయం కలిగింది. ఇక JPMorgan Chaseలో సాంకేతిక సమస్యతో పలువురు బ్యాంకు ఖాతాదారులు Online Banking సేవలను వినియోగించుకోలేకపోయారు. గతవారం Microsoft 365 సేవలు నిలిచిపోవడంతో ప్రపంచవ్యాప్తంగా పలు కార్యాలయాల్లో పనులు మందగించాయి. ఈ ఘటనల వెనుక సైబర్ దాడులు కాకుండా Software Releases, Network Upgrades, Internal System Failures వంటి సాంకేతిక కారణాలే ఉన్నాయని సంబంధిత సంస్థలు చెబుతున్నాయి. డిజిటల్ సేవలపై ప్రపంచం ఎక్కువగా ఆధారపడుతున్న తరుణంలో ఇలాంటి అంతరాయాలు మరోసారి ఆందోళన కలిగిస్తున్నాయి. చిన్న Software Updateలో తలెత్తే లోపం కూడా ప్రపంచవ్యాప్తంగా కోట్లాది మంది రోజువారీ కార్యకలాపాలపై ప్రభావం చూపే పరిస్థితి ఉందని ఈ ఘటనలు స్పష్టం చేస్తున్నాయి.

మరిన్ని వార్తలు