సమ్మక్క సాగర్ డీపీఆర్‌పై సీఎం అసంతృప్తి
రాష్ట్ర సాగునీటి ప్రాజెక్టులపై ముఖ్యమంత్రి రేవంత్ రెడ్డి (Chief Minister Revanth Reddy) కీలక సమీక్ష నిర్వహించారు. మంగళవారం హైదరాబాద్‌లోని ఎంసీఆర్ హెచ్‌ఆర్‌డీలో ఇరిగేషన్ శాఖ అధికారులతో సమావేశమైన సీఎం.. పలు ప్రాజెక్టుల పురోగతి, అనుమతులు, నీటి వాటాల అంశాలపై చర్చించారు.
సమ్మక్క సాగర్ ప్రాజెక్టుకు సంబంధించిన సమగ్ర ప్రాజెక్టు నివేదిక (Detailed Project Report)ను కేంద్ర జల సంఘం (సీడబ్ల్యూసీ) వెనక్కి పంపడంపై సీఎం తీవ్ర అసంతృప్తి వ్యక్తం చేశారు. సీడబ్ల్యూసీ కోరిన అన్ని వివరాలను సమగ్రంగా సేకరించి, ఎలాంటి లోపాలు లేకుండా మళ్లీ సమర్పించాలని అధికారులను ఆదేశించారు. ఛత్తీస్‌గఢ్ ప్రభుత్వం నుంచి అవసరమైన నిరభ్యంతర పత్రం (NOC) త్వరగా పొందేందుకు చర్యలు తీసుకోవాలని సూచించారు.
కాళేశ్వరం ప్రాజెక్టులో అదనపు టీఎంసీ పనుల విషయంలో అధికారులు తొందరపాటు నిర్ణయాలు తీసుకోవద్దని సీఎం స్పష్టం చేశారు. అన్ని అంశాలను క్షుణ్ణంగా పరిశీలించి, నిపుణుల సూచనల మేరకు ముందుకెళ్లాలని సూచించారు.
రాష్ట్రానికి రావాల్సిన కృష్ణా జలాల వాటా విషయంలోనూ సీఎం కీలక సూచనలు చేశారు. సుప్రీంకోర్టులో తెలంగాణ వాదనలను బలంగా వినిపించాలని, రాష్ట్ర ప్రయోజనాలకు భంగం కలగకుండా అవసరమైన ఆధారాలు, నివేదికలను సిద్ధం చేసుకోవాలని అధికారులను ఆదేశించారు.రాష్ట్ర సాగునీటి ప్రాజెక్టులకు సంబంధించిన అనుమతులు, పెండింగ్ అంశాలను త్వరితగతిన పరిష్కరించడంతో పాటు తెలంగాణ ప్రయోజనాల పరిరక్షణకు ప్రాధాన్యత ఇవ్వాలని సీఎం స్పష్టం చేశారు.
