మూడు కంపెనీలను హ్యాక్ చేసిన గూగుల్ జెమిని.. ఇదే తొలిసారి!
ఆర్టిఫిషియల్ ఇంటెలిజెన్స్ రంగంలో సంచలన ఘటన చోటుచేసుకుంది. సైబర్ సెక్యూరిటీ(Cybersecurity) సామర్థ్యాలను పరీక్షిస్తున్న సమయంలో గూగుల్కు చెందిన ఏఐ మోడల్ ‘జెమిని’(Gemini) స్వయంగా మూడు కంపెనీల వ్యవస్థల్లోకి చొరబడినట్లు గూగుల్ వెల్లడించింది. ఏఐ మోడల్ స్వతంత్రంగా ఇలాంటి హ్యాకింగ్ చర్యలకు పాల్పడటం బహుశా ఇదే తొలిసారి కావచ్చని భావిస్తున్నారు.
గూగుల్ అధికారి ఒకరు బీబీసీకి వెల్లడించిన వివరాల ప్రకారం.. పరీక్షలో భాగంగా జెమిని ఆన్లైన్లో అందుబాటులో ఉన్న బహిరంగ సమాచారాన్ని శోధించింది. అనంతరం పరీక్షలో భాగంగా ఉన్నాయని భావించిన కొన్ని వెబ్సైట్లను యాక్సెస్ చేసేందుకు అవసరమైన ఆధారాలను మోడల్ స్వయంగా ఊహించినట్లు తెలిపారు.అయితే ఈ ప్రయత్నాల సమయంలో ప్రతి సందర్భంలోనూ జెమిని స్వయంగా ఆ ప్రక్రియను నిలిపివేసిందని గూగుల్ అధికారి పేర్కొన్నారు. ఈ ఘటనలు మే నెలలో చోటుచేసుకున్నట్లు సమాచారం. ఉల్లంఘనలకు గురైన మూడు కంపెనీలకు ఈ విషయాన్ని గూగుల్ ఇప్పటికే తెలియజేసింది.
ఏఐ భద్రతపై పెరుగుతున్న ఆందోళనలు
ఏఐ టెక్నాలజీ అభివృద్ధి వేగం, దాని వల్ల భవిష్యత్తులో ఎదురయ్యే ప్రమాదాలపై ప్రపంచవ్యాప్తంగా చర్చ జరుగుతున్న సమయంలో ఈ ఘటన వెలుగులోకి వచ్చింది. అధునాతన ఏఐ వ్యవస్థల సామర్థ్యాలు పెరుగుతున్న కొద్దీ వాటి దుర్వినియోగం, సైబర్ భద్రతకు ఎదురయ్యే ముప్పులపై నిపుణులు ఆందోళన వ్యక్తం చేస్తున్నారు. మరోవైపు, ఏఐ అభివృద్ధి వేగాన్ని తగ్గించాలన్న వాదనతో అన్ని టెక్ కంపెనీలు, నిపుణులు ఏకీభవించడం లేదు. ఏఐ సామర్థ్యాలను మరింత అభివృద్ధి చేస్తూనే భద్రతా ప్రమాణాలను బలోపేతం చేయడంపై ప్రస్తుతం టెక్ రంగంలో తీవ్ర చర్చ కొనసాగుతోంది.
