రైతు సమస్యల పరిష్కారమే లక్ష్యంగా అఖిలభారత రైతు మహాసభలు..

బహిరంగ సభను జయప్రదం చేయాలని సీపీఎం నాయకుల పిలుపు

ఆలేరు, నవంబర్ 3 (విజయక్రాంతి): అఖిలభారత రైతు సంఘం(All India Farmers' Union) 36వ జాతీయ మహాసభల సందర్భంగా ఈ నెల 15న నల్లగొండలో నిర్వహించనున్న భారీ బహిరంగ సభను జయప్రదం చేయాలని సీపీఎం నాయకులు(CPM leaders) పిలుపునిచ్చారు. మంగళవారం మోటకొండూరు బస్టాండ్ ఆవరణలో సీపీఎం మండల కమిటీ(CPM Mandal Committee) ఆధ్వర్యంలో సభకు సంబంధించిన కరపత్రాలను ఆవిష్కరించారు.

ఈ సందర్భంగా సీపీఎం జిల్లా కమిటీ సభ్యులు బొలగాని జయరాములు, మండల కార్యదర్శి కొల్లూరు ఆంజనేయులు మాట్లాడుతూ.. సెప్టెంబర్ 15 నుంచి 18 వరకు జరగాల్సిన 36వ జాతీయ రైతు మహాసభల కార్యక్రమంలో భాగంగా నవంబర్ 15న నల్లగొండలో లక్ష మంది రైతులతో భారీ ప్రదర్శన, బహిరంగ సభ నిర్వహించనున్నట్లు తెలిపారు.

రైతులు, వ్యవసాయ కార్మికులు, కర్షకులు, రైతు శ్రేయోభిలాషులు అధిక సంఖ్యలో పాల్గొని సభను విజయవంతం చేయాలని కోరారు. రాష్ట్రంలోని బీడు భూములకు సాగునీరు అందించే ప్రాజెక్టులు పూర్తి చేయాలని, పోడు భూములకు పట్టాలివ్వాలని, కౌలు రైతులకు న్యాయం చేయాలని డిమాండ్ చేశారు.

పెండింగ్‌లో ఉన్న రైతు రుణమాఫీ, రైతు భరోసా నిధులను వెంటనే విడుదల చేయాలని, నాణ్యమైన ఎరువులు, విత్తనాలు సరఫరా చేయడంతో పాటు పెంచిన ఎరువుల ధరలను తగ్గించి వ్యవసాయానికి సబ్సిడీలు పెంచాలని కోరారు. రైతులను రుణ విముక్తులను చేయాలని, రైతు వ్యతిరేక విధానాలను ఉపసంహరించుకోవాలని ప్రభుత్వాన్ని డిమాండ్ చేశారు.

అభివృద్ధి కార్యక్రమాల పేరుతో చేపట్టే భూసేకరణకు 2013 భూసేకరణ చట్టం ప్రకారం తగిన పరిహారం చెల్లించాలని అన్నారు. ఎల్‌నినో ప్రభావంతో వాతావరణ పరిస్థితులు మారి, భూగర్భ జలమట్టాలు తగ్గడంతో వర్షాకాలంలో సాగు చేసిన పంటలకు తీవ్ర నష్టం వాటిల్లిందని, బాధిత రైతులకు ప్రభుత్వం న్యాయం చేయాలని కోరారు.

ఈ కార్యక్రమంలో సీపీఎం మండల నాయకులు బందెల పోచయ్య, సీహెచ్ రోమన్, వడ్డెబోయిన మహేందర్, చెరుకు అనిల్, చీరాల ఉపేందర్, రైతులు బావండ్లపల్లి వెంకటేష్, పాపయ్య, వంగపల్లి మచ్చగిరి, అయిలరెడ్డి శ్రీనివాస్, రాములు, యాదయ్య, నరసింహ, వెంకటేష్ తదితరులు పాల్గొన్నారు.