ఫీనిక్స్ ఇన్విటేషనల్ టోర్నీ షురూ
ఇండియన్ గోల్ఫ్ ప్రీమియర్ లీగ్(Indian Golf Premier League) సందడి మళ్లీ హైదరాబాద్‌లో మొదలైంది. హైదరాబాద్ ఫైర్‌బ ర్డ్స్ జీసీ సమర్పణలో వూటీ గోల్ఫ్ కౌంటీ వేదికగా ’ఫీనిక్స్ ఇన్విటేషనల్ 2026’టోర్నమెంట్ ప్రారంభం కానుంది. బుధవారం నుండి శుక్రవారం వరకూ ఈ టోర్నీ జరుగుతుంది. ఈ టోర్నమెంట్‌కు సంబంధించిన ట్రోఫీని నిర్వాహకులు ఆవిష్కరించారు.
హైదరాబాద్ ఫైర్‌బర్డ్స్ జట్టుకు కీలకంగా ఉన్న బైసోయా ప్రధాన టోర్నమెంట్‌తో పాటు ఈ వారం చివర్లో బౌల్డర్ హిల్స్లో జరగనున్న లీగ్ సరికొత్త ఫార్మాట్ ఎక్స్-గోల్ఫ్ కోసం తన జట్టు సభ్యులైన రంజిత్ సింగ్, రాఘవ్ చుగ్ మరియు అర్జున్ భాటిలతో కలిసి బరిలోకి దిగనున్నారు.
ఈ ఏడాది ఆరు అంతర్జాతీయ వేదికలతో సహా ఈ లీగ్ ఇప్పటివరకు 10 ఈవెంట్లను విజయవంతంగా పూర్తి చేసుకుందని ఐజీపీఎల్ సీఈఓ ఉత్తమ్ సింగ్ ముండీ చెప్పారు. ఈ లీగ్-ఇంటిగ్రేటెడ్ టూర్ ద్వారా పురుషులు, మహిళా ప్రొఫెషనల్ గోల్ఫర్లు ఇద్దరూ సమాన ప్రైజ్ మనీ కోసం పోటీపడేలా ఒకే వేదికపైకి వస్తున్నారని తెలిపారు.
