కరోనా మళ్లీ కలకలం.. ప్రపంచ దేశాల్లో కొత్త వేరియంట్

ప్రపంచాన్ని వణికించిన కరోనా మహమ్మారి పూర్తిగా కనుమరుగైందనుకుంటున్న తరుణంలో మరో కొత్త వేరియంట్ (COVID-19 Variant) తెరపైకి వచ్చింది. SARS-CoV-2 వైరస్‌కు చెందిన PJ.2.1 వంశం (Virus Lineage) పలు దేశాల్లో గుర్తించబడుతుండటంతో అంతర్జాతీయంగా వైద్య, ఆరోగ్య రంగాలు అప్రమత్తమవుతున్నాయి. కెనడాలో తొలిసారిగా గుర్తించిన ఈ వైరస్ వంశం ఉత్తర అమెరికా, యూరప్, ఆసియా, ఆస్ట్రేలియా, న్యూజిలాండ్ ప్రాంతాలకు విస్తరించినట్లు పరిశోధన నివేదికలు వెల్లడిస్తున్నాయి.

2026 మే 2న కెనడాలోని అంటారియో ప్రావిన్స్‌లో PJ.2.1కు సంబంధించిన తొలి నమూనా గుర్తించారు. అనంతరం కెనడాలోని ఇతర ప్రాంతాలతో పాటు అమెరికాలోనూ దీని ఆనవాళ్లు బయటపడ్డాయి. జూన్ చివరి నాటికి అమెరికాలో తొలి నమూనా గుర్తించగా, ఆ తర్వాత పలు రాష్ట్రాల్లోనూ ఈ వైరస్ వంశం ఉనికిని గుర్తించారు.యూరప్‌లో ఫ్రాన్స్, స్పెయిన్ తదితర దేశాల్లోనూ దీని ఉనికి బయటపడింది. ఆసియాలో సింగపూర్, ఇజ్రాయెల్‌తో పాటు ఆస్ట్రేలియా, న్యూజిలాండ్‌లలోనూ PJ.2.1 నమూనాలు గుర్తించినట్లు పరిశోధన నివేదికలు వెల్లడిస్తున్నాయి. దీంతో ఈ వైరస్ వ్యాప్తిపై అంతర్జాతీయ స్థాయిలో నిఘా పెరిగింది.

PJ.2.1 సాధారణ వైరస్ రూపాంతరాలతో పోలిస్తే భిన్నమైన జన్యు మార్పులను కలిగి ఉందని పరిశోధకులు చెబుతున్నారు. దీనిని 'సాల్టేషన్ వేరియంట్' (Saltation Variant)గా అభివర్ణిస్తున్నారు. అంటే వైరస్‌లో క్రమంగా చిన్నచిన్న మార్పులు చోటుచేసుకోవడం కాకుండా, ఒకేసారి గణనీయమైన జన్యు మార్పులు సంభవించి కొత్త రూపం ఏర్పడటమన్నమాట.ఈ వంశంలోని స్పైక్ ప్రోటీన్‌లో (Spike Protein) అనేక మార్పులు ఉన్నట్లు ప్రాథమిక పరిశోధనల్లో వెల్లడైంది. మానవ కణాల్లోకి వైరస్ ప్రవేశించేందుకు కీలకమైన ACE2 గ్రాహకంతో అనుసంధానమయ్యే సామర్థ్యం దీని వ్యాప్తిపై ప్రభావం చూపి ఉండవచ్చని శాస్త్రవేత్తలు విశ్లేషిస్తున్నారు.

ఈ వైరస్ వంశం పలు ప్రాంతాల్లో గుర్తించబడుతున్నప్పటికీ, గత రూపాలతో పోలిస్తే తీవ్రమైన అనారోగ్యాన్ని కలిగిస్తుందా? ఆసుపత్రుల్లో చేరికలు పెరుగుతాయా? టీకాల ద్వారా ఏర్పడిన రోగనిరోధక శక్తిని ఎంతవరకు అధిగమించగలదు? అనే అంశాలపై మరింత అధ్యయనం అవసరం.ప్రాథమిక పరిశోధనల్లో టీకాల ద్వారా ఏర్పడిన యాంటీబాడీలను పూర్తిగా తప్పించుకునే సామర్థ్యం ఉందని నిర్ధారణ కాలేదు. అలాగే ఈ వైరస్ వల్ల వ్యాధి తీవ్రత పెరిగిందనే స్పష్టమైన ఆధారాలు కూడా ప్రస్తుతం అందుబాటులో లేవు.

కరోనా వైరస్ రూపాంతరం చెందుతూ కొత్త వంశాలుగా మారడం సహజ పరిణామమేనని వైద్య నిపుణులు గుర్తుచేస్తున్నారు. అయితే అంతర్జాతీయ ప్రయాణాలు, ప్రజల రాకపోకలు ఎక్కువగా ఉన్న ప్రస్తుత పరిస్థితుల్లో కొత్త వైరస్ వంశాల వ్యాప్తిని నిరంతరం పర్యవేక్షించడం కీలకమని సూచిస్తున్నారు. దగ్గు, జ్వరం, గొంతునొప్పి, జలుబు వంటి శ్వాసకోశ లక్షణాలు కనిపిస్తే నిర్లక్ష్యం చేయకుండా వైద్యులను సంప్రదించాలని సూచిస్తున్నారు.

మొత్తానికి.. కరోనా కథ ముగిసిపోయిందనుకుంటున్న సమయంలో PJ.2.1 రూపంలో మరో కొత్త పరిణామం తెరపైకి వచ్చింది. ప్రపంచ దేశాలు దీని వ్యాప్తిని నిశితంగా గమనిస్తున్నాయి. అయితే ప్రస్తుతానికి భయాందోళనలకు గురికాకుండా అప్రమత్తంగా ఉండటం, అవసరమైన జాగ్రత్తలు పాటించడమే ముఖ్యమని నిపుణులు సూచిస్తున్నారు.