పోలీస్ ఫ్లాగ్ డే విద్యార్థులకు రోడ్డు భద్రత దుష్ప్రభావాలపై అవగాహన
- విద్యార్థులకు ట్రాఫిక్ నియమాలపై అవగాహన
- మాదకద్రవ్యాల దుష్ప్రభావాలపై వ్యాసరచన పోటీలు
చేవెళ్ల, అక్టోబర్ 24 (విజయక్రాంతి): పోలీస్ ఫ్లాగ్ డే వారోత్సవాలు(Police Flag Day Week Celebrations)–2026 సందర్భంగా చేవెళ్ల ట్రాఫిక్ పోలీస్ స్టేషన్ ఆధ్వర్యంలో విద్యార్థులకు రోడ్డు భద్రత(Road Safety), ట్రాఫిక్ నియమాలు, మాదకద్రవ్యాల(Narcotics) దుష్ప్రభావాలపై అవగాహన కల్పించేందుకు ప్రత్యేక కార్యక్రమాలు నిర్వహించారు.
ఈ సందర్భంగా చేవెళ్లలోని సత్యసాయి గ్రామర్ హైస్కూల్(Sathya Sai Grammar High School) విద్యార్థులకు ట్రాఫిక్ పోలీస్ స్టేషన్‌లో ఫిజికల్ ఓపెన్ హౌస్ కార్యక్రమం నిర్వహించారు. ట్రాఫిక్ పోలీసుల విధులు, ట్రాఫిక్ నియంత్రణ, రోడ్డు ప్రమాదాల నివారణలో పోలీసుల పాత్రను వివరించారు. బ్రీత్‌ అనలైజర్లు, కెమెరాలు, ట్యాబ్లెట్లు, బాటన్లు, రిఫ్లెక్టివ్‌ జాకెట్లు, టింట్‌ మీటర్లు తదితర ట్రాఫిక్ ఎన్‌ఫోర్స్‌మెంట్‌ పరికరాలను విద్యార్థులకు పరిచయం చేశారు. రోడ్డు ప్రమాదాలకు దారితీసే కారణాలు, వాటి నివారణ చర్యలను వివరించారు.
అలాగే చేవెళ్లలోని బి.జె.ఆర్. వొకేషనల్ జూనియర్ కళాశాలలో మాదకద్రవ్యాల దుర్వినియోగం, వాటి దుష్ప్రభావాలపై వ్యాసరచన పోటీలు నిర్వహించారు. మత్తు పదార్థాల వినియోగం వల్ల ఆరోగ్యంతోపాటు కుటుంబ, సామాజిక జీవితాలపై పడే ప్రతికూల ప్రభావాలను వివరించారు. విద్యార్థులు మాదకద్రవ్యాలకు దూరంగా ఉంటూ ఆరోగ్యకరమైన భవిష్యత్తును నిర్మించుకోవాలని సూచించారు. ఈ సందర్భంగా విద్యార్థులు తప్పనిసరిగా హెల్మెట్ ధరించాలని, కార్లలో ప్రయాణించేటప్పుడు సీటు బెల్ట్ పెట్టుకోవాలని పోలీసులు సూచించారు.
మైనర్లకు వాహనాలు ఇవ్వడం, ట్రిపుల్ రైడింగ్, మద్యం సేవించి వాహనాలు నడపడం, డ్రైవింగ్ సమయంలో మొబైల్ ఫోన్ ఉపయోగించడం, రాంగ్ రూట్‌లో ప్రయాణించడం వంటి ప్రమాదకర చర్యలకు దూరంగా ఉండాలని స్పష్టం చేశారు. ప్రతి ఒక్కరూ ట్రాఫిక్ నిబంధనలు పాటిస్తూ రోడ్డు ప్రమాదాల నివారణకు సహకరించాలని, మాదకద్రవ్యాల రహిత సమాజ నిర్మాణంలో భాగస్వాములు కావాలని కోరారు.
తమ కుటుంబ సభ్యులు, స్నేహితులకు సైతం రోడ్డు భద్రత, మాదకద్రవ్యాల దుష్ప్రభావాలపై అవగాహన కల్పించాలని సూచించారు. ఈ కార్యక్రమాల్లో చేవెళ్ల ట్రాఫిక్ ఎస్‌హెచ్‌ఓ బి. సతీష్, ట్రాఫిక్ పోలీస్ సిబ్బంది, సత్యసాయి గ్రామర్ హైస్కూల్ ప్రిన్సిపాల్ అరుణ్, విద్యార్థులు, బి.జె.ఆర్. వొకేషనల్ జూనియర్ కళాశాల విద్యార్థులు పాల్గొన్నారు.
