కరెంట్‌ ఫుల్‌.. నీళ్లు నిల్‌! మోటార్లు ఆన్‌ చేయొద్దు: భట్టి
రాష్ట్రంలో విద్యుత్‌ డిమాండ్‌ భారీగా పెరిగినా సరఫరాలో ఎలాంటి ఇబ్బందులు తలెత్తకుండా చర్యలు తీసుకున్నామని ఉప ముఖ్యమంత్రి భట్టి విక్రమార్క తెలిపారు. రాష్ట్రంలో విద్యుత్‌ డిమాండ్‌ (Power Demand) 20 వేల మెగావాట్లకు పైగా నమోదైనప్పటికీ అవసరాలకు అనుగుణంగా సరఫరా చేశామని వెల్లడించారు.
సాధారణంగా అక్టోబర్‌ నెలలో విద్యుత్‌ డిమాండ్‌ తగ్గుతుందని, అయితే ఈసారి అందుకు భిన్నంగా 25 శాతం పెరిగిందని వివరించారు. పెరిగిన డిమాండ్‌కు అనుగుణంగా విద్యుత్‌ సరఫరా (Power Supply) అందించేందుకు చర్యలు చేపట్టినట్లు తెలిపారు.
నీళ్లు లేని చోట మోటార్లు ఆన్‌ చేయొద్దు
మరోవైపు, రాష్ట్రంలో సుమారు 15 లక్షల పంప్‌సెట్లకు భూగర్భ జలాలు అందుబాటులో లేని పరిస్థితి ఉందని భట్టి విక్రమార్క తెలిపారు. నీరు లేని చోట మోటార్లు ఆన్‌ చేయడం వల్ల విద్యుత్‌ వృథా అయ్యే అవకాశం ఉందని అన్నారు.
భూగర్భ జలాలు (Groundwater) అందుబాటులో లేని పరిస్థితుల్లో మోటార్లు ఆన్‌ చేయవద్దని రైతులకు ఉప ముఖ్యమంత్రి విజ్ఞప్తి చేశారు. నీటి లభ్యతను బట్టి వ్యవసాయ మోటార్లను వినియోగించాలని సూచించారు. విద్యుత్‌ను పొదుపుగా వినియోగించడం ద్వారా అనవసరమైన వృథాను అరికట్టవచ్చని తెలిపారు (Power Conservation).
