చెల్లికి జగన్‌ లేఖ.. కుటుంబ పంచాయితీకి తెరపడేనా?

అంజలి వివాహం నేపథ్యంలో వైఎస్‌ షర్మిలకు మాజీ ముఖ్యమంత్రి వైఎస్‌ జగన్‌మోహన్‌రెడ్డి లేఖ రాశారు. అంజలి పెళ్లి విషయంలో సంతోషం వ్యక్తం చేస్తూనే, బెంగళూరులోని తన నివాసంలో వివాహ వేడుక నిర్వహించడంపై భద్రతా కారణాలతో అభ్యంతరం తెలిపారు.

తమ మధ్య ఎన్ని వివాదాలు ఉన్నప్పటికీ అంజలి సంతోషంగా ఉండాలని జగన్ ఆకాంక్షించారు. తన అభ్యంతరాలను పట్టించుకోకుండా బెంగళూరులోని తన నివాసంలోనే అంజలి పెళ్లి నిర్వహించాలని షర్మిల భావిస్తున్న విషయం తన దృష్టికి వచ్చిందని లేఖలో వివరించారు.

భద్రత, వ్యక్తిగత గోప్యతకు ముప్పు

తన నివాసంలో వివాహ వేడుక నిర్వహిస్తే భద్రతాపరమైన సమస్యలు తలెత్తే అవకాశం ఉందని జగన్ అభిప్రాయపడ్డారు. భద్రత, వ్యక్తిగత గోప్యత (Privacy)కు ముప్పు వాటిల్లే అంశాన్ని ఏమాత్రం విస్మరించలేనని స్పష్టం చేశారు. ఈ నిర్ణయాన్ని అంత సులభంగా తీసుకోలేదని, హర్ష లేదా వర్ష వివాహం విషయంలోనూ తాను ఇదే నిర్ణయం తీసుకునేవాడినని లేఖలో వివరించారు.

అంజలికి అంతా మంచే జరగాలి

కుటుంబంలో విభేదాలు ఉన్నప్పటికీ అంజలికి అంతా మంచే జరగాలని జగన్ ఆకాంక్షించారు. తనతో పాటు తన కుటుంబం కూడా సురక్షితంగా ఉండాల్సిన అవసరం ఉందని స్పష్టం చేశారు. భద్రత(Security), వ్యక్తిగత గోప్యతకు ప్రాధాన్యం ఇవ్వాల్సిందేనని తన లేఖలో తెలిపారు.