రైతుల నెత్తిన నిషేధిత మందుల భారం
కన్నాయిగూడెం, నవంబర్ 01 (విజయక్రాంతి): ములుగు జిల్లా కన్నాయిగూడెం మండలంలోని పలు గ్రామాల్లో నిషేధిత గడ్డి మందుల విక్రయాలు జరుగుతున్నాయనే ఆరోపణలు కలకలం రేపుతున్నాయి. కేంద్ర, రాష్ట్ర ప్రభుత్వాలు నిషేధించిన పారా క్వాట్‌ (Paraquat) మందును కొందరు ఎరువుల దుకాణాల నిర్వాహకులు రహస్యంగా విక్రయిస్తూ సొమ్ము చేసుకుంటున్నారని స్థానికంగా ప్రచారం జరుగుతోంది. కంపెనీ ప్రతినిధుల ద్వారా బిల్లులు లేకుండా మందులను తెప్పించి, రహస్య ప్రాంతాల్లో నిల్వ ఉంచి అధిక ధరలకు అమ్ముతున్నారనే ఆరోపణలు వినిపిస్తున్నాయి (Illegal Sales).
నిషేధిత గడ్డి మందులను కొనుగోలు చేసిన పలువురు రైతులకు చేదు అనుభవం ఎదురైనట్లు తెలుస్తోంది. మందు పిచికారీ చేసినా గడ్డి చావకపోవడంతో తాము మోసపోయామని రైతులు ఆవేదన వ్యక్తం చేస్తున్నట్లు సమాచారం. లీటరు, ఐదు లీటర్ల డబ్బాల్లో మందులను నిల్వ చేసి విక్రయిస్తున్నారని, లీటరు ధర రూ.500 నుంచి రూ.600 వరకు వసూలు చేస్తున్నారని ఆరోపణలు ఉన్నాయి (Farmers' Losses).
బిల్లులు ఇవ్వకుండా విక్రయాలు సాగిస్తున్నారని, పంటలకు నష్టం వాటిల్లినా తమకు సంబంధం లేదన్న ధోరణితో కొందరు వ్యాపారులు వ్యవహరిస్తున్నారని స్థానికులు చెబుతున్నారు. చదువురాని రైతులను ఆసరాగా చేసుకుని ఈ వ్యాపారం సాగిస్తున్నారనే విమర్శలు వినిపిస్తున్నాయి. కొందరి అక్రమ విక్రయాల కారణంగా నిబంధనలు పాటించే ఇతర ఎరువుల దుకాణాలకూ చెడ్డపేరు వస్తోందని వ్యాపారులు ఆందోళన వ్యక్తం చేస్తున్నట్లు సమాచారం (Unregulated Trade).
ఏజెన్సీ ప్రాంతమైన కన్నాయిగూడెం మండలంలో నిషేధిత మందుల విక్రయాలు జరుగుతున్నాయనే ఆరోపణలు ఉన్నప్పటికీ వ్యవసాయశాఖ అధికారులు పూర్తిస్థాయిలో పర్యవేక్షణ చేపట్టడం లేదనే విమర్శలు వెల్లువెత్తుతున్నాయి. అప్పుడప్పుడు తనిఖీలు నిర్వహించి వెళ్తున్నారే తప్ప, రహస్య ప్రాంతాల్లో నిల్వ చేసిన మందులపై చర్యలు తీసుకోవడం లేదని స్థానికులు ఆరోపిస్తున్నారు.
విక్రయిస్తున్న మందులు కల్తీవా? కంపెనీ ప్రతినిధుల నుంచే కల్తీ మందులు సరఫరా అవుతున్నాయా? అనే అంశాలపై స్పష్టత రావాల్సి ఉంది. నిషేధిత మందుల విక్రయాల వల్ల రైతుల పంటలకు నష్టం వాటిల్లే ప్రమాదం ఉందని పలువురు ఆందోళన వ్యక్తం చేస్తున్నారు. సంబంధిత అధికారులు వెంటనే క్షేత్రస్థాయిలో తనిఖీలు నిర్వహించి, అక్రమ నిల్వలు, విక్రయాలపై చర్యలు తీసుకోవాలని రైతులు కోరుతున్నారు.
