ఓటీటీ ఒత్తిడితో హైందవ వాయిదా.. ఫిబ్రవరికి రిలీజ్?

21-11-2026 | 04:15pm

టాలీవుడ్‌లో సినిమా వాయిదాల పర్వం కొనసాగుతోంది. భారీ బడ్జెట్ చిత్రాల నుంచి చిన్న, మీడియం రేంజ్ సినిమాల వరకు విడుదల తేదీలు మారిపోతున్నాయి. ఇప్పటికే ‘ఫౌజీ’, ‘స్పిరిట్’ వంటి క్రేజీ ప్రాజెక్టుల విడుదలపై వాయిదాల ప్రభావం కనిపిస్తుండగా, ‘వారణాసి’ విషయంలోనూ రిలీజ్ డేట్‌పై చర్చ సాగుతోంది. తాజాగా ఈ జాబితాలో బెల్లంకొండ సాయి శ్రీనివాస్ నటించిన ‘హైందవ’ కూడా చేరింది. ఈ నెల 27న ప్రేక్షకుల ముందుకు రావాల్సిన ‘హైందవ’ అనివార్య కారణాలతో వాయిదా పడినట్లు చిత్రబృందం ప్రకటించింది. అయితే సినిమా వాయిదా వెనుక ఓటీటీ సంస్థల (OTT Platforms) ఒత్తిడి ఉందనే ప్రచారం టాలీవుడ్‌లో జోరుగా వినిపిస్తోంది.

సినిమా షూటింగ్ పూర్తవడంతో పాటు ఫస్ట్ కాపీ (First Copy) కూడా సిద్ధంగా ఉందని తెలుస్తోంది. అయినప్పటికీ ఓటీటీ సంస్థల అభ్యంతరాల కారణంగా విడుదలను వాయిదా వేయాల్సి వచ్చిందని సినీ వర్గాల్లో చర్చ జరుగుతోంది. బెల్లంకొండ సాయి శ్రీనివాస్ నటించిన మరో చిత్రం ‘టైసన్ నాయుడు’ డిసెంబరులో విడుదలకు సిద్ధమవుతోంది. ఒకే హీరో నటించిన రెండు సినిమాలు తక్కువ వ్యవధిలో థియేటర్లలోకి వస్తే ఓటీటీ హక్కుల వ్యాపారంపై ప్రభావం పడుతుందనే ఆందోళన ఉన్నట్లు ప్రచారం జరుగుతోంది.

సాధారణంగా ఒక హీరో నటించిన రెండు సినిమాల మధ్య కనీసం రెండు నెలల వ్యవధి ఉండాలని ఓటీటీ సంస్థలు భావిస్తున్నట్లు సమాచారం. ఇప్పటికే పలుమార్లు వాయిదా పడిన ‘టైసన్ నాయుడు’ను మరింత ఆలస్యం చేస్తే సినిమాపై ఆసక్తి తగ్గే అవకాశం ఉంది. దీంతో ‘హైందవ’ను వెనక్కి జరపాలని నిర్ణయించినట్లు ప్రచారం సాగుతోంది.

డిసెంబరులో ‘టైసన్ నాయుడు’ విడుదలైతే ఆ తర్వాత రెండు నెలల విరామం అవసరం. జనవరిలో సంక్రాంతి సినిమాల సందడి ఉండటంతో ఆ సమయంలో ‘హైందవ’ను విడుదల చేయడం నిర్మాతలకు అంత అనుకూలంగా కనిపించడం లేదు. దీంతో ఫిబ్రవరిలోనే ఈ సినిమా ప్రేక్షకుల ముందుకు వచ్చే అవకాశాలున్నాయనే చర్చ నడుస్తోంది. డిజిటల్ హక్కుల (Digital Rights) లెక్కలు కూడా విడుదల తేదీలను ప్రభావితం చేస్తున్నాయని ఈ పరిణామం స్పష్టం చేస్తోంది.

ఓటీటీ ఒప్పందాలు, డిజిటల్ హక్కుల వ్యాపారం సినిమా విడుదల తేదీలను సైతం శాసిస్తున్నాయనే చర్చకు ‘హైందవ’ వాయిదా మరో ఉదాహరణగా నిలుస్తోంది. అయితే కొత్త విడుదల తేదీపై చిత్రబృందం నుంచి అధికారిక ప్రకటన రావాల్సి ఉంది.

మరిన్ని వార్తలు