పట్టభద్రుల ఓట్లతో ప్రభుత్వ వైఫల్యాలకు బుద్ధి చెప్పాలి!

రైతుల కన్నీళ్లు కనిపించడం లేదా? 

ఎమ్మెల్సీ ఎన్నికల్లో పట్టభద్రులు చురుగ్గా పాల్గొనాలి: బీజేపీ నేతలు

పాఠశాలలో 15 రోజుల్లో తాగునీటి సమస్య పరిష్కరించకపోతే కార్యాచరణ ప్రకటిస్తాం

శ్రీరంగాపూర్, అక్టోబర్ 24: ప్రజా సమస్యలను పరిష్కరించడంలో కాంగ్రెస్ ప్రభుత్వం(Congress government) విఫలమైందని, ఎన్నికల(Elections) ముందు ఇచ్చిన హామీలకు క్షేత్రస్థాయిలో అమలు మాత్రం కనిపించడం లేదని బీజేపీ నాయకులు(BJP leaders) తీవ్రస్థాయిలో విమర్శించారు. మాటలతో కాలక్షేపం చేయడం మానేసి ప్రజల సమస్యలపై దృష్టి సారించాలని ప్రభుత్వానికి హితవు పలికారు.

శనివారం వనపర్తి జిల్లా(Wanaparthy District) శ్రీరంగాపూర్ మండల కేంద్రంలో నిర్వహించిన విలేకరుల సమావేశంలో బీజేపీ రాష్ట్ర కార్యవర్గ సభ్యుడు, జిల్లా ఎన్నికల కన్వీనర్ పురుషోత్తం రెడ్డి మాట్లాడుతూ రానున్న పట్టభద్రుల ఎమ్మెల్సీ ఎన్నికల్లో అర్హులైన ప్రతి పట్టభద్రుడు ఓటరు నమోదు చేసుకుని ప్రజాస్వామ్య ప్రక్రియలో భాగస్వామి కావాలని పిలుపునిచ్చారు. పట్టభద్రుల ఓటు కేవలం హక్కు మాత్రమే కాదని, పాలకుల పనితీరును ప్రశ్నించే శక్తివంతమైన ఆయుధమని పేర్కొన్నారు.

ప్రతి మండలానికి ఒక కంప్యూటర్ ఆపరేటర్‌ను అందుబాటులో ఉంచామని, అర్హులైన పట్టభద్రులు వారి వద్దకు వెళ్లి ఓటరు నమోదును పూర్తి చేసుకోవాలని కోరారు. రైతుల సమస్యలపై ప్రభుత్వానికి చిత్తశుద్ధి ఎక్కడ? పంటలు ఎండిపోతున్నా రైతులను ఆదుకునేందుకు తగిన చర్యలు తీసుకోవడం లేదని బీజేపీ నాయకులు ఆరోపించారు. రైతులకు పంటల బీమా పథకాన్ని అమలు చేయడంతో పాటు ఎన్నికల సమయంలో ప్రకటించిన ఆరు గ్యారంటీలను పూర్తిస్థాయిలో అమలు చేయాలని డిమాండ్ చేశారు.

అభివృద్ధిపై దృష్టి సారించాల్సిన ముఖ్యమంత్రి రేవంత్ రెడ్డి, మాజీ ముఖ్యమంత్రి కేసీఆర్‌పై విమర్శలకే ప్రాధాన్యం ఇస్తున్నారని విమర్శించారు. జూరాల నీటి నిర్వహణ, పదవీ విరమణ చేసిన ఉద్యోగులకు చెల్లింపుల విషయంలోనూ ప్రభుత్వ వైఫల్యం కనిపిస్తోందని ఆరోపించారు.

కేంద్రంలోని నరేంద్ర మోదీ ప్రభుత్వం అమలు చేస్తున్న అభివృద్ధి, సంక్షేమ పథకాలను ప్రజల్లోకి తీసుకెళ్లాలని పార్టీ శ్రేణులకు పిలుపునిచ్చారు. విలేకరుల సమావేశం అనంతరం బీజేపీ నాయకులు శ్రీరంగాపూర్ ప్రాథమిక ఉన్నత పాఠశాలను సందర్శించి విద్యార్థులు ఎదుర్కొంటున్న సమస్యలను పరిశీలించారు. ముఖ్యంగా తాగునీరు, మధ్యాహ్న భోజనం తదితర మౌలిక వసతులపై ఆరా తీశారు.

విద్యార్థులకు కనీసం తాగునీరు అందించలేని పరిస్థితి నెలకొనడం ఆందోళనకరమని పేర్కొన్నారు. విద్యార్థుల ప్రాథమిక అవసరాలను తీర్చడంలో నిర్లక్ష్యం వహిస్తే సహించేది లేదని స్పష్టం చేశారు. 15 రోజుల్లోగా తాగునీటి సమస్యను పరిష్కరించకపోతే బీజేపీ ఆధ్వర్యంలో తదుపరి కార్యాచరణ ప్రకటించి, సమస్య పరిష్కారమయ్యే వరకు పోరాటం చేస్తామని హెచ్చరించారు. విద్యార్థులకు అవసరమైన మౌలిక వసతులు కల్పించడం అధికారుల బాధ్యత అని, ఆ బాధ్యతను విస్మరిస్తే ప్రజల తరఫున నిలదీస్తామని పేర్కొన్నారు. ఈ కార్యక్రమంలో బీజేపీ జిల్లా ప్రధాన కార్యదర్శి పెద్దిరాజు, మండల అధ్యక్షుడు నల్లోత్తుల విష్ణు తదితర నాయకులు పాల్గొన్నారు.