జిల్లా స్థాయి రోల్‌ప్లే పోటీల్లో ఇమాంపేట పాఠశాలకు ప్రథమ బహుమతి

సూర్యాపేట రూరల్:  జిల్లా కేంద్రంలోని బాలభవన్‌లో నిర్వహించిన జిల్లా స్థాయి రోల్‌ప్లే పోటీల్లో సూర్యాపేట మండల పరిధిలోని ఇమంపేట పాఠశాలకు ప్రథమ బహుమతి వచ్చింది. ఈ కార్యక్రమానికి జిల్లా విద్యాధికారి శ్రీనివాసరావు(District Educational Officer Srinivas Rao) ముఖ్య అతిథిగా హాజరై విద్యార్థుల్లో సృజనాత్మకత, సామాజిక స్పృహ పెంపొందించేందుకు రోల్‌ప్లే పోటీలు ఎంతగానో దోహదపడతాయని పేర్కొన్నారు.

ఈ పోటీల్లో తొమ్మిదో తరగతి విద్యార్థులు ఆరోగ్యం, పరిశుభ్రత, మానసిక శ్రేయస్సు, మాదకద్రవ్యాల నివారణ, బాధ్యతాయుత పౌరసత్వం వంటి పలు సామాజిక అంశాలపై నాటకీయ ప్రదర్శనలిచ్చి ఆలోచింపజేశారు. వివిధ పాఠశాలల విద్యార్థులు ఉత్సాహంగా పాల్గొన్న ఈ పోటీల్లో ఇమాంపేట టీజీ మోడల్ స్కూల్ బృందం ప్రథమ బహుమతి సాధించి రాష్ట్రస్థాయికి ఎంపిక కాగా, ఎంఎస్ఆర్ సెంట్రల్ స్కూల్ ద్వితీయ, జలాలపురం జడ్పీహెచ్ఎస్ తృతీయ స్థానాలను దక్కించుకున్నాయి. అనంతరం విజేతలకు డీఈఓ శ్రీనివాసరావు చేతుల మీదుగా మెమెంటోలు, ప్రశంసాపత్రాలు అందజేశారు.