సంగక్కరకు చేదు అనుభవం
విమానాశ్రయంలో సంగక్కర కుటుంబానికి అవమానం? Ryanair సిబ్బందిపై ఫైర్!
శ్రీలంక క్రికెట్ దిగ్గజం, మాజీ కెప్టెన్ కుమార సంగక్కర (Kumar Sangakkara) చేసిన తాజా ఆరోపణలు క్రీడా ప్రపంచంలో చర్చనీయాంశంగా మారాయి. ఐర్లాండ్ రాజధాని డబ్లిన్‌లోని విమానాశ్రయంలో Ryanair ఎయిర్‌లైన్ సిబ్బంది తనతో పాటు తన కుటుంబం పట్ల వివక్షపూరితంగా వ్యవహరించారని ఆయన ఆరోపించారు. సిబ్బంది మాట్లాడిన తీరు, ప్రయాణ విధానాలను నిర్వహించిన పద్ధతి, బెదిరింపులకు పాల్పడుతున్నట్లుగా కనిపించిన ప్రవర్తన తనను తీవ్రంగా కలచివేసిందని సోషల్ మీడియా ప్లాట్‌ఫామ్ X (ఎక్స్)లో వెల్లడించారు.
డబ్లిన్ ఎయిర్‌పోర్టులో Ryanair గేట్ సిబ్బంది నుంచి మరెవరికైనా ఇలాంటి Discrimination అనుభవం ఎదురైందా? అంటూ సంగక్కర ప్రశ్నించారు. తనకు, తన కుటుంబానికి ఎదురైన అనుభవం ఎంతో షాకింగ్‌గా ఉందని పేర్కొన్నారు. ప్రయాణికులతో ఇలాంటి ప్రవర్తన ఏమాత్రం ఆమోదయోగ్యం కాదని స్పష్టం చేశారు. డబ్లిన్‌లో తనకు ఎదురైన తొలి చేదు అనుభవం ఇదేనని తెలిపారు. అయితే, ఈ ఘటనకు సంబంధించి అసలు వివాదం ఎందుకు మొదలైంది? సిబ్బందితో ఏ విషయంలో విభేదాలు తలెత్తాయి? అనే వివరాలను ఆయన వెల్లడించలేదు.
సంగక్కర చేసిన పోస్ట్‌పై సంజీవ వీరవారణ అనే మరో శ్రీలంక వ్యక్తి స్పందించారు. పాశ్చాత్య దేశాల్లో తాను కూడా తరచూ వివక్షను ఎదుర్కొన్నానని పేర్కొన్నారు. దీనికి స్పందించిన సంగక్కర.. ఇలాంటి అనుభవాలు ఎదురైనప్పుడు తీవ్రంగా కలత చెందుతామని వ్యాఖ్యానించారు. ఈ ఘటనపై Ryanair సంస్థ అధికారికంగా స్పందించిందా? బాధ్యులపై ఏమైనా చర్యలు తీసుకుంటుందా? అనే అంశాలపై స్పష్టత రావాల్సి ఉంది. ఇదిలా ఉండగా, కుమార సంగక్కర శ్రీలంక క్రికెట్ చరిత్రలో అత్యంత విజయవంతమైన బ్యాటర్లలో ఒకరు. 2015లో అంతర్జాతీయ క్రికెట్‌కు వీడ్కోలు పలికిన ఆయన 134 Test మ్యాచ్‌లు, 404 ODI మ్యాచ్‌ల్లో శ్రీలంకకు ప్రాతినిధ్యం వహించారు. 2007, 2011 వన్డే ప్రపంచకప్‌లలో శ్రీలంక జట్టు ఫైనల్‌కు చేరడంలో కీలక పాత్ర పోషించారు. ప్రస్తుతం IPLలో రాజస్థాన్ రాయల్స్ (Rajasthan Royals) జట్టుకు హెడ్ కోచ్‌గా వ్యవహరిస్తున్నారు. మైదానంలో ఎన్నో విజయాలు అందించిన ఈ మాజీ కెప్టెన్, విమానాశ్రయంలో ఎదురైన అనుభవంపై చేసిన వ్యాఖ్యలు ఇప్పుడు సోషల్ మీడియాలో చర్చకు దారితీశాయి.
