భూ'గర్భశోష'
కాలుష్య గరళం-2
నీరు, వాయు కాలుష్యానికి గర్భస్థపిండాలు బలి
సుల్తాన్పూర్, ఇస్నాపూర్, బొల్లారం ఏరియాల్లో గర్భశోకాలెన్నో..
* దినదినం పురోగతి చెందుతున్న పారిశ్రామిక అభివృద్ధి ప్రజల సాధారణ జీవనాన్ని హరిస్తోంది. వివిధ పరిశ్రమల నుంచి వెలువడే విషవాయువులు ఊపిరితీస్తున్నాయి. ఫ్యాక్టరీల నుంచి విడుదలయ్యే రసాయనపూరిత వ్యర్థ జలాలు జీవుల ప్రాణాలను అధోపాతాళం పట్టిస్తున్నాయి. ఫ్యాక్టరీల్లో పనిచేసే కార్మికుల కుటుంబాలే కాదు, సాధారణ ప్రజలు కూడా గాలి, నీరు కాలుష్యం వల్ల చావుకోరల్లో కాలం వెళ్లదీస్తున్నారు.
నేలలోకి ఇంకిన వ్యర్థపు నీరు భూగర్భ జలాలను విషంగా మార్చడమే కాదు, గర్భస్థ శిశువుల పాలిట చావుకోరలు విసురుతోంది. పిండస్థ దశలోనే ప్రాణాలను చిదిమేస్తున్నది. లోకంలోకి అడుగుపెట్టక ముందే అండపిండాలను అంతం చేస్తున్నది. పటాన్చెరు పరిసర ప్రాంతాల్లోని పరిశ్రమలు సమాజానికి భూ‘గర్భ’ శోకం మిగుల్చుతున్నాయి. భూ‘గర్భా న్ని’ కలుషితం చేస్తున్నాయి.
- పారిశ్రామిక వాడల్లో శిశువుల మృత్యుఘోష
- నీరు, వాయు కాలుష్యానికి బలైపోతున్న గర్భస్థపిండాలు
- గర్భిణుల పాలిట శాపంగా మారిన విషవలయం
- ఇండస్ట్రియల్ బెల్ట్‌లో రెండు రెట్లు ఎక్కువగా గర్భస్రావాలు
- తల్లుల రక్తంలో, పాలలోనూ ఫార్మా, రసాయనాల అవశేషాలు
- సుల్తాన్పూర్, ఇస్నాపూర్, బొల్లారం ఏరియాల్లో గర్భశోకాలెన్నో భూ‘గర్భాన్ని’ కలుషితం చేస్తున్నాయి
సంగారెడ్డి బ్యూరో, అక్టోబర్ 2 (విజయక్రాంతి): ఒకవైపు పారిశ్రామిక వృద్ధి(Industrial growth), ఉపాధి అవకాశాలతో(employment opportunities) కళకళలాడుతున్నట్లు కనిపించే పటాన్చెరు ఇండస్ట్రియల్ బెల్ట్(Patancheru Industrial Belt) వెనుక ఊహించని ఒక నిశ్శబ్ద మానవ విపత్తు దాగి ఉంది. ఇక్కడి పరిశ్రమలు యథేచ్ఛగా వదులుతున్న రసాయన వ్యర్థాలు(Chemical waste), విషపూరిత గాలి కేవలం పర్యావరణాన్ని మాత్రమే కాదు.. పుట్టబోయే పసిప్రాణాలను కూడా బలితీసుకుంటున్నాయి. పటాన్చెరు దాని చుట్టుపక్కల గ్రామాల్లోని గర్భిణులు ఎదుర్కొంటున్న వరుస గర్భస్రావాలు, కడుపులోనే శిశు మరణాలు వింటే గుండె తరుక్కుపోతోంది.
గతంలో మెడికల్ జర్నల్స్(Medical Journals), వివిధ స్వచ్ఛంద ఆరోగ్య సంస్థలు పటాన్చెరు, బొల్లారం పరిసర ప్రాంతాల్లోని వందలాది జంటలపై జరిపిన క్లినికల్ స్టడీస్‌లో విస్తుబోయే నిజాలు వెల్లడయ్యాయి. సాధారణంగా తల్లి గర్భంలోని పిండానికి బాహ్య కాలుష్యం తగలకుండా ప్లాసెంటా (మాయ) రక్షణ కవచంలా పనిచేస్తుంది. కానీ ఇక్కడి గాలిలో, నీటిలో ఉన్న పీఎం 2.5 సూక్ష్మ ధూళికణాలు, ఆర్సెనిక్, సీసం వంటి భారీ లోహాలు ఆ రక్షణ కవచాన్ని దాటి నేరుగా పిండంలోకి ప్రవేశిస్తున్నట్లు ఎయిమ్స్, ఐసీఎంఆర్ అధ్యయనాలు స్పష్టం చేస్తున్నాయి.
కడుపులోనే ఊపిరాడక..
ఈ రసాయనాలు గర్భాశయంలో చేరడం వల్ల శిశువు ఎదుగుదలకు అవసరమైన ప్రొటీన్ల ఉత్పత్తి నిలిచిపోతుంది. దీనివల్ల కడుపులోని శిశువుకు ఆక్సిజన్ అందక, శ్వాస ఆడకుండా లోపలే మరణిస్తున్నారు. ఒక దశలో ఇక్కడి బాధితులపై జరిపిన పరిశోధనల్లో.. గర్భిణుల రక్తంలోనే కాకుండా, బిడ్డకు అమృతంలా అందాల్సిన తల్లి రొమ్ము పాలలో కూడా పారిశ్రామిక రసాయనాల అవశేషాలు ఉన్నట్లు తేలడం తీవ్ర కలకలం రేపింది. పటాన్చెరు ఇండస్ట్రియల్ జోన్కు అతి సమీపంలో ఉండే సుల్తాన్పూర్, ఇస్నాపూర్, పాశమైలారం, గడ్డపోతారం వంటి గ్రామాల్లో పరిస్థితి అత్యంత దారుణంగా ఉంది.
ఈ గ్రామాల్లోని ఎంతోమంది మహిళలకు పెళ్లయిన కొన్ని సంవత్సరాల వరకు పిల్లలు కలగడం లేదు. ఒకవేళ గర్భం దాల్చినా 3 లేదా 4వ నెల వచ్చేసరికి అకస్మాత్తుగా గర్భస్రావం జరిగిన సంఘటనలు కోకొల్లలు. ఇలా ఒక్కొక్క మహిళకు 3 నుంచి 4 సార్లు అబార్షన్లు అయిన ఉదంతాలు ఇక్కడ సర్వసాధారణంగా మారాయి.
అంగవైకల్యంతో జననాలు...
ఒకవేళ నెలలు నిండి పిల్లలు పుట్టినా వారు గుండె జబ్బులు, శారీరక లోపాలు, లేదా తీవ్రమైన మానసిక వైకల్యాలతో జన్మిస్తున్నారని స్థానికులు కన్నీరుమున్నీరవుతున్నారు. గతంలో అంతర్జాతీయ పరిశోధకులు పటాన్చెరు పరిసర వాగులు, నల్లచెరువు నీటిని పరీక్షించినప్పుడు సమాజాన్ని పట్టిపీడించే ఒక దారుణమైన నిజం బయటపడింది. ఇక్కడి ఫార్మా కంపెనీల వల్ల నీటిలో సిప్రోఫ్లోక్సాసిన్స్ వంటి యాంటిబయాటిక్ డ్రగ్ వ్యర్థాలు ప్రపంచంలో ఎక్కడా లేనంత అత్యధిక మోతాదులో ఉన్నట్లు తేలింది. ఈ నీటి ప్రభావం వల్ల స్థానిక ప్రజల్లో, పుట్టే పిల్లల్లో రోగనిరోధక శక్తి పూర్తిగా క్షీణించి, చిన్న ఇన్ఫెక్షన్లకే ప్రాణాలు కోల్పోయే పరిస్థితి వస్తుందని తేలడం ఆందోళనలకు దారితీస్తోంది.
దశాబ్ధాల క్రితమే పర్యావరణ ఉద్యమం...
దశాబ్ధాల క్రితమే స్థానిక డాక్టర్ కిషన్ రావు గర్భిణుల్లో చోటుచేసుకుంటున్న ఈ మార్పులను గమనించి, ప్రజలను ఏకం చేసి పటాన్చెరు పర్యావరణ ఉద్యమానికి శ్రీకారం చుట్టారు. పటాన్చెరు కాలుష్యంపై దాఖలైన పిల్‌ను విచారించిన సుప్రీంకోర్టు, ఇక్కడి భూగర్భ జలాలు పూర్తిగా నాశనమయ్యాయని గుర్తించి, పరిశ్రమల నుంచి ఒక్క చుక్క రసాయన నీరు బయటకు రాకుండా ’జీరో లిక్విడ్ డిశ్చార్జ్’ అమలు చేయాలని, బాధితులకు నష్టపరిహారం ఇవ్వాలని ఆదేశాలు జారీ చేసింది. కానీ క్షేత్రస్థాయిలో ఎలాంటి మార్పు రాలేదు.
