గుర్తుతెలియని వాహనం ఢీకొని వ్యక్తి మృతి

గండీడ్, సెప్టెంబర్ 12, (విజయక్రాంతి): మండల పరిధిలోని రెడ్డిపల్లి గ్రామానికి చెందిన బీస్ వెంకట్ రెడ్డి(50) పని నిమిత్తం గండీడ్‌కు వచ్చి తిరిగి రెడ్డిపల్లిలోని తన ఇంటికి వెళ్తుండగా రోడ్డు ప్రమాదం జరిగింది. శుక్రవారం రాత్రి ఈ ప్రమాదం చోటుచేసుకుంది. రోడ్డు దాటుతున్న సమయంలో గుర్తుతెలియని వాహనం వెంకట్ రెడ్డిని ఢీకొట్టింది. ఈ ప్రమాదంలో ఆయన తలకు తీవ్ర గాయాలు కావడంతో అక్కడికక్కడే మృతి చెందినట్లు స్థానికులు తెలిపారు.

మృతుడికి భార్య అనిత, కుమారుడు శ్రీనివాస్ రెడ్డి ఉన్నారు. వెంకట్ రెడ్డి మృతితో రెడ్డిపల్లి గ్రామంలో విషాదఛాయలు అలుముకున్నాయి. ప్రమాదానికి కారణమైన గుర్తుతెలియని వాహనం ఆపకుండా వెళ్లిపోయినట్లు తెలిసింది. సమాచారం అందుకున్న పోలీసులు సంఘటనా స్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం మహబూబ్‌నగర్ జిల్లా ఆసుపత్రికి తరలించారు. 

మృతుడి భార్య అనిత ఇచ్చిన ఫిర్యాదు మేరకు కేసు నమోదు చేసి దర్యాప్తు చేపట్టినట్లు మహమ్మదాబాద్ ఎస్‌ఐ శేఖర్ రెడ్డి తెలిపారు. ప్రమాదానికి కారణమైన వాహనాన్ని గుర్తించేందుకు పోలీసులు ప్రయత్నిస్తున్నారు.