డబుల్ బెడ్‌రూమ్ ఇళ్లపై కీలక అప్‌డేట్
హైదరాబాద్: డబుల్ బెడ్‌రూమ్ ఇళ్ల(Double Bedroom Houses) కోసం ఎదురుచూస్తున్న వారికి సంబంధించి తెలంగాణ ప్రభుత్వం కీలక ప్రక్రియను వేగవంతం చేయనుంది. హైదరాబాద్, రంగారెడ్డి, మేడ్చల్–మల్కాజిగిరి జిల్లాల్లో లబ్ధిదారుల ఎంపికను ఈ నెలాఖరులోగా పూర్తి చేయాలని హౌసింగ్ శాఖ అధికారులను మంత్రి పొంగులేటి శ్రీనివాస్ రెడ్డి(Ponguleti Srinivas Reddy) ఆదేశించారు.
ఆన్‌లైన్ డ్రాతో లబ్ధిదారుల ఎంపిక
డబుల్ బెడ్‌రూమ్ ఇళ్ల కేటాయింపులో పారదర్శకతకు ప్రాధాన్యం ఇవ్వాలని మంత్రి సూచించారు. హౌసింగ్ కార్పొరేషన్ రూపొందించిన ప్రత్యేక సాఫ్ట్‌వేర్ ద్వారా లబ్ధిదారులను ఎంపిక చేసేందుకు ఆన్‌లైన్ డ్రా నిర్వహించనున్నట్లు తెలిపారు. ఈ ప్రక్రియను ప్రత్యక్ష ప్రసారం చేయడంతో పాటు, డ్రాకు సంబంధించిన వివరాలను ఆన్‌లైన్‌లో ఎప్పుడైనా పరిశీలించుకునే అవకాశం కల్పిస్తామని వెల్లడించారు. అర్హులైన వారందరికీ న్యాయం జరిగేలా ఎంపిక ప్రక్రియను నిర్వహించాలని అధికారులకు సూచించారు.
ఇందిరమ్మ టవర్ల నిర్మాణంపై సమీక్ష
రాష్ట్ర సచివాలయంలో హైదరాబాద్, రంగారెడ్డి, మేడ్చల్ జిల్లాల కలెక్టర్లు, హౌసింగ్ శాఖ అధికారులతో మంత్రి సమీక్ష నిర్వహించారు. పట్టణ పేదల ఉపాధికి ఇబ్బందులు కలగకుండా, వారు ప్రస్తుతం నివసిస్తున్న ప్రాంతాలకు సమీపంలోనే ఇందిరమ్మ ఇళ్ల నిర్మాణానికి ప్రణాళికలు రూపొందించాలని తెలిపారు. ఇందిరమ్మ టవర్ల నిర్మాణానికి అవసరమైన స్థలాలను గుర్తించడంలో వేగం పెంచాలని, మూడు విడతలకు సరిపడా భూములను అందుబాటులోకి తీసుకురావాలని ఆదేశించారు. స్థలాల ఎంపికలో ప్రభుత్వ భూముల పరిరక్షణకు ప్రాధాన్యం ఇవ్వాలని స్పష్టం చేశారు.
పేదల సొంతింటి కలే లక్ష్యం
అర్హులైన పేదలకు ఇళ్లను అందించడమే ప్రభుత్వ ప్రధాన లక్ష్యమని పొంగులేటి పేర్కొన్నారు. భూముల గుర్తింపు నుంచి నిర్మాణాల ప్రారంభం వరకు ప్రతి దశలోనూ అధికారులు సమన్వయంతో పనిచేయాలని సూచించారు. డబుల్ బెడ్‌రూమ్ ఇళ్ల ఎంపిక, ఇందిరమ్మ టవర్ల నిర్మాణానికి సంబంధించిన తదుపరి చర్యలపై ప్రభుత్వం దృష్టి సారించడంతో లబ్ధిదారుల్లో ఆసక్తి నెలకొంది.
