తెలంగాణలో డబుల్ డెక్కర్‌కు గ్రీన్ సిగ్నల్
తెలంగాణలో కీలక మౌలిక వసతుల అభివృద్ధి (Infrastructure Development) ప్రాజెక్టులపై కేంద్ర రోడ్డు రవాణా, జాతీయ రహదారుల శాఖ మంత్రి నితిన్‌ గడ్కరీతో రాష్ట్ర మంత్రి కోమటిరెడ్డి వెంకట్‌రెడ్డి సమావేశమయ్యారు. ఢిల్లీలో జరిగిన ఈ భేటీలో పలు రహదారుల నిర్మాణం, విస్తరణ, ఎలివేటెడ్‌ కారిడార్లకు సంబంధించిన అంశాలపై చర్చించారు. రాష్ట్రంలో రవాణా సౌకర్యాలను మెరుగుపరిచే ప్రాజెక్టులను వేగవంతం చేయాలని కోమటిరెడ్డి కోరారు.హైదరాబాద్‌లో ట్రాఫిక్‌ సమస్యల పరిష్కారానికి ప్రతిపాదించిన ఎల్బీనగర్‌–హయత్‌నగర్‌ డబుల్ డెక్కర్‌ ఎలివేటెడ్‌ కారిడార్‌ (Double-Decker Elevated Corridor) నిర్మాణానికి గడ్కరీ ఆమోదం తెలిపినట్లు సమాచారం. ఈ ప్రాజెక్టు పూర్తయితే ఆ మార్గంలో వాహనాల రాకపోకలు మరింత సులభతరం కానున్నాయి.
కృష్ణా నదిపై ప్రతిపాదించిన ఐకానిక్‌ కేబుల్‌ బ్రిడ్జి (Iconic Cable Bridge) పనులను వేగవంతం చేయాలని గడ్కరీ అధికారులను ఆదేశించారు. అలాగే జాతీయ రహదారి 765పై ఎలివేటెడ్‌ కారిడార్‌ నిర్మాణానికి సంబంధించి సమగ్ర ప్రాజెక్టు నివేదిక (Detailed Project Report – DPR) సిద్ధం చేయాలని సూచించారు. హైదరాబాద్‌–అమరావతి గ్రీన్‌ఫీల్డ్‌ హైవే (Greenfield Highway) ప్రతిపాదనపై గడ్కరీ సానుకూలంగా స్పందించినట్లు సమావేశంలో వెల్లడించారు. ఈ రహదారి నిర్మాణం రెండు తెలుగు రాష్ట్రాల మధ్య రవాణా అనుసంధానాన్ని మెరుగుపరచడంతో పాటు ప్రయాణ సమయాన్ని తగ్గించేందుకు దోహదపడే అవకాశం ఉంది.
హైదరాబాద్‌–విజయవాడ–మచిలీపట్నం రహదారి విస్తరణ పనులను వేగవంతం చేస్తామని గడ్కరీ హామీ ఇచ్చినట్లు సమాచారం. ఈ ప్రాజెక్టుల పురోగతిపై రాష్ట్ర ప్రభుత్వం కేంద్రంతో సమన్వయం చేసుకుంటూ ముందుకు వెళ్లాలని నిర్ణయించింది.హైదరాబాద్‌లో నవంబర్‌ 19 నుంచి 22 వరకు నిర్వహించనున్న ఇండియన్‌ రోడ్‌ కాంగ్రెస్‌ (Indian Roads Congress) కార్యక్రమానికి హాజరుకావాలని కోమటిరెడ్డి వెంకట్‌రెడ్డి కేంద్ర మంత్రి గడ్కరీని ఆహ్వానించారు. రాష్ట్రంలో రహదారుల అభివృద్ధి, భవిష్యత్‌ మౌలిక వసతుల ప్రాజెక్టులపై ఈ సమావేశం ప్రాధాన్యం సంతరించుకుంది
