బస్సు-ట్రక్కు ఢీ
ఛత్తీస్‌గఢ్‌లో రోడ్డు ప్రమాదం.. బస్సు-లారీ ఢీ, ముగ్గురు మృతి!
బలోదాబజార్: ఛత్తీస్‌గఢ్‌లో తెల్లవారుజామున ఘోర రోడ్డు ప్రమాదం(Chhattisgarh Bus-Truck Collision) చోటుచేసుకుంది. బిలాస్‌పూర్‌–రాయ్‌పూర్ నేషనల్ హైవేపై రోడ్డుపై నిలిచిపోయిన లారీని ప్రయాణికులతో వెళ్తున్న ప్రైవేట్ బస్సు బలంగా ఢీకొట్టింది. ఈ ప్రమాదంలో కనీసం ముగ్గురు మృతి చెందగా, మరో 8 నుంచి 10 మంది వరకు గాయపడినట్లు ప్రాథమిక సమాచారం వెల్లడించింది. ఈ ఘటనతో ప్రమాద స్థలంలో తీవ్ర గందరగోళం నెలకొంది.
సోమవారం ఉదయం సుమారు 5:30 గంటల సమయంలో ఈ ప్రమాదం జరిగినట్లు సమాచారం. అంబికాపూర్‌ నుంచి రాయ్‌పూర్‌కు వెళ్తున్న బస్సులో 22 మంది ప్రయాణికులు ఉన్నారు. మార్గమధ్యంలో సాంకేతిక లోపంతో రోడ్డుపై నిలిచిపోయిన ట్రక్కును బస్సు వెనుకవైపు నుంచి ఢీకొట్టింది. ఢీకొన్న తీవ్రతకు బస్సు దెబ్బతినడంతో ప్రయాణికులు భయాందోళనలకు గురయ్యారు. లారీ సమీపంలో భద్రత కోసం స్టాపర్లు ఉంచినప్పటికీ ప్రమాదం చోటుచేసుకున్నట్లు ప్రాథమిక వివరాలు చెబుతున్నాయి.
బస్సులో చిక్కుకున్న ప్రయాణికులు.. గ్యాస్ కట్టర్లతో రెస్క్యూ
ప్రమాద సమాచారం అందిన వెంటనే పోలీసులు, అంబులెన్సులు, రెస్క్యూ బృందాలు ఘటనాస్థలికి చేరుకున్నాయి. బస్సు దెబ్బతినడంతో కొందరు ప్రయాణికులు లోపలే చిక్కుకుపోయారు. వారిని బయటకు తీసుకురావడానికి సహాయక సిబ్బంది Gas Cutters, ప్రత్యేక పరికరాలను ఉపయోగించారు. అనంతరం గాయపడిన వారిని బయటకు తీసి అంబులెన్సుల ద్వారా ఆసుపత్రికి తరలించే ప్రక్రియ చేపట్టారు. గాయపడిన వారికి సిమ్గా ప్రభుత్వ ఆసుపత్రిలో చికిత్స అందిస్తున్నట్లు ప్రాథమిక నివేదికలు తెలిపాయి. పోలీసులు ప్రమాద స్థలంలో సహాయక చర్యలను కొనసాగిస్తూ, ప్రమాదానికి దారితీసిన పరిస్థితులపై వివరాలు సేకరిస్తున్నారు. రోడ్డుపై సాంకేతిక లోపంతో నిలిచిపోయే భారీ వాహనాల వద్ద తగిన హెచ్చరికలు, భద్రతా చర్యలు ఎంత ముఖ్యమో ఈ ఘటన మరోసారి గుర్తుచేస్తోంది. మృతులు, క్షతగాత్రుల పూర్తి వివరాలపై అధికారిక సమాచారం వెలువడాల్సి ఉంది.
