టెన్షన్‌కు బ్రేక్.. రాత్రికి రాత్రే సీన్ మారింది!

బ్యాంకు సమ్మెకు చివరి నిమిషంలో బ్రేక్

నెలాఖరులో ఖాతాదారులకు భారీ ఊరట! 

న్యూఢిల్లీ: దేశవ్యాప్తంగా బ్యాంకు ఖాతాదారులు మూడు రోజుల పాటు బ్యాంకింగ్ సేవలకు అంతరాయం తప్పదని భావిస్తున్న వేళ చివరి నిమిషంలో కీలక పరిణామం చోటుచేసుకుంది. సెప్టెంబర్ 28, 29, 30 తేదీల్లో నిర్వహించాల్సిన మూడు రోజుల దేశవ్యాప్త బ్యాంకు సమ్మెను(bank strike deferred 2026) యునైటెడ్ ఫోరం ఆఫ్ బ్యాంక్ యూనియన్స్ (UFBU) వాయిదా వేసింది. ఆదివారం రాత్రి ఇండియన్ బ్యాంక్స్ అసోసియేషన్ (IBA), UFBU మధ్య జరిగిన చర్చల అనంతరం ఈ నిర్ణయం తీసుకున్నారు.

అసలు సమ్మె ఎందుకు వాయిదా పడింది?

బ్యాంకు ఉద్యోగ సంఘాల ప్రధాన డిమాండ్లలో ఐదు రోజుల బ్యాంకింగ్ విధానం కీలకంగా ఉంది. అంటే ప్రస్తుతం ఉన్న రెండో, నాలుగో శనివారాల సెలవులతో పాటు మిగిలిన శనివారాలను కూడా సెలవు దినాలుగా ప్రకటించాలన్నది యూనియన్ల డిమాండ్. ఈ అంశంపై IBA, యుఎఫ్‌బియు(UFBU bank strike) మధ్య జరిగిన చర్చల్లో హై లెవల్ కమిటీని వెంటనే ఏర్పాటు చేయాలని నిర్ణయించారు. ఈ కమిటీ అన్ని ప్రత్యామ్నాయాలను పరిశీలించి, సంబంధిత వర్గాలతో చర్చించి, ముఖ్యంగా ఖాతాదారుల ప్రయోజనాలను దృష్టిలో పెట్టుకుని పరిష్కారం కనుగొనేందుకు ప్రయత్నించనుంది.

అదే సమయంలో Scale IV, అంతకంటే పై స్థాయి అధికారులకు సంబంధించిన Performance Linked Incentive (PLI) విధానం విషయంలోనూ చర్చలు కొనసాగించేందుకు అంగీకారం కుదిరింది. యూనియన్లు లేవనెత్తిన ఇతర పెండింగ్ అంశాలను కూడా పరిష్కరించేందుకు చర్చలు జరగనున్నాయి. ఈ పరిణామాల నేపథ్యంలో ప్రస్తుతం ప్రకటించిన సమ్మెను వాయిదా వేస్తున్నట్లు UFBU వెల్లడించింది. ఇది సమ్మె పూర్తిగా రద్దు కావడం కాదు.. ప్రస్తుతానికి వాయిదా పడటం అనే విషయాన్ని గుర్తుంచుకోవాలి.

ఇప్పుడు బ్యాంకులు పనిచేస్తాయా?

అవును. సెప్టెంబర్ 28 నుంచి 30 వరకు జరగాల్సిన సమ్మె వాయిదా పడటంతో సంబంధిత బ్యాంకు శాఖలు(banks open today) సాధారణంగా పనిచేయనున్నాయి. ముఖ్యంగా సెప్టెంబర్ 28న దేశవ్యాప్తంగా సమ్మె కారణంగా బ్యాంకులు మూసివేయబడతాయని భావించిన పరిస్థితి ఇప్పుడు మారిపోయింది. SBI వంటి ప్రభుత్వ రంగ బ్యాంకుల శాఖలు సాధారణ కార్యకలాపాలు కొనసాగించనున్నట్లు సమాచారం. అయితే బ్యాంకు ఖాతాదారులు తమకు సంబంధించిన శాఖ స్థానికంగా ఇచ్చే సూచనలను కూడా పరిశీలించడం మంచిది.

సమ్మె జరిగి ఉంటే ఏం జరిగేది?

ఈ సమ్మె సాధారణ రోజుల్లో జరిగి ఉంటే ప్రభావం ఒక స్థాయిలో ఉండేది. కానీ సెప్టెంబర్ చివరి మూడు రోజుల్లో సమ్మె(bank strike impact) జరగాల్సి రావడం వల్ల ప్రభావం మరింత ఎక్కువగా ఉండే అవకాశం ఉంది. సెప్టెంబర్ 30 బ్యాంకులకు హాఫ్-ఇయర్లీ క్లోజింగ్ కావడంతో నెలాఖరు లావాదేవీలు, చెక్ క్లియరెన్స్, సెటిల్‌మెంట్లు, శాఖలలో ఖాతాలకు సంబంధించిన పనులపై ఒత్తిడి పెరిగే పరిస్థితి ఉండేది. సమ్మె కొనసాగి ఉంటే ముఖ్యంగా బ్రాంచ్ ఆధారిత సేవల్లో ఆలస్యం ఏర్పడే అవకాశం ఉందని ముందుగానే బ్యాంకులు ప్రత్యామ్నాయ ఏర్పాట్లపై దృష్టి పెట్టాయి.

ATM, UPI, Online Banking సంగతేంటి?

సమ్మె జరిగినా డిజిటల్ బ్యాంకింగ్ సేవలు పూర్తిగా నిలిచిపోయే పరిస్థితి ఉండకపోవచ్చు. UPI, మొబైల్ బ్యాంకింగ్, ఇంటర్నెట్ బ్యాంకింగ్ వంటి డిజిటల్ సేవలు సాధారణంగా కొనసాగేందుకు అవకాశం ఉండేది. అయితే చెక్ క్లియరెన్స్, శాఖల్లో నగదు లావాదేవీలు, డాక్యుమెంట్ ఆధారిత సేవలు వంటి వాటిపై ఉద్యోగుల సమ్మె ప్రభావం చూపే అవకాశం ఉండేది.

నెలాఖరు కావడంతో ఎందుకు కీలకం?

ఇప్పుడు సమ్మె వాయిదా(bank employees strike) పడటంతో ఖాతాదారులకు ముఖ్యంగా నెలాఖరు లావాదేవీల విషయంలో ఊరట లభించింది. జీతాలు, పెన్షన్లు, EMIలు, చెక్కులు, వ్యాపార చెల్లింపులు, సంస్థల సెటిల్‌మెంట్లు వంటి అనేక ఆర్థిక కార్యకలాపాలు నెల చివర్లో ఎక్కువగా జరుగుతాయి. దీనికి తోడు సెప్టెంబర్ 30 బ్యాంకుల హాఫ్-ఇయర్లీ క్లోజింగ్ కావడంతో, ఆ సమయంలో శాఖల కార్యకలాపాలకు అంతరాయం ఏర్పడితే బ్యాంకింగ్ వ్యవస్థపై అదనపు ఒత్తిడి పడే అవకాశం ఉండేది. అందుకే మూడు రోజుల సమ్మె వాయిదా పడటం ఖాతాదారులకు, వ్యాపారాలకు, నెలాఖరు బ్యాంకింగ్ కార్యకలాపాలకు తక్షణ ఉపశమనంగా మారింది.

అయితే కథ ఇక్కడితో ముగియలేదా?

ఇప్పటికైతే సెప్టెంబర్ 28–30 సమ్మె వాయిదా పడింది. కానీ ఐదు రోజుల బ్యాంకింగ్, PLI తదితర అంశాలపై చర్చలు ఇంకా కొనసాగాల్సి ఉంది. హై లెవల్ కమిటీ చర్చల ద్వారా పరిష్కారం కనుగొనడమే తదుపరి కీలక దశ. అందువల్ల ఖాతాదారులకు ప్రస్తుతానికి ఊరట లభించినప్పటికీ, బ్యాంకు ఉద్యోగ సంఘాల డిమాండ్లపై తుది పరిష్కారం ఇంకా రావాల్సి ఉంది.