రైతుల సమస్యపై ఏఈ ఝాన్సీ రాణి స్పందన అభినందనీయం
అఖిల భారత హిందూ మహాసభ రాష్ట్ర అధ్యక్షుడు కొనకటి రమేశ్ రెడ్డి
నల్లబెల్లి, అక్టోబర్ 27 (విజయ క్రాంతి ): రైతుల సాగునీటి సమస్యపై సత్వరమే స్పందించి పరిష్కార చర్యలు చేపట్టిన సంబంధిత అసిస్టెంట్ ఇంజినీర్ (ఏఈ) ఝాన్సీ రాణి కి(Assistant Engineer (AE) Jhansi Rani) అఖిల భారత హిందూ మహాసభ రాష్ట్ర అధ్యక్షుడు కొనకటి రమేశ్ రెడ్డి హృదయపూర్వక ధన్యవాదాలు, కృతజ్ఞతలు తెలిపారు. అక్టోబర్ 27 మంగళవారం ఆయన ఈ మేరకు ఒక ప్రకటన విడుదల చేశారు.
రైతుల సాగునీటి ఎద్దడిపై ప్రచురితమైన వార్తకు అధికారి సానుకూలంగా స్పందించి, వెంటనే చర్యలు తీసుకోవడం ప్రశంసనీయమని పేర్కొన్నారు. రైతులకు సక్రమంగా సాగునీరు అందించడం ద్వారా పంటలను కాపాడటమే కాకుండా, వ్యవసాయ రంగానికి పెద్ద భరోసా కల్పించినట్లయిందని ఆయన తెలిపారు.
మీడియా పాత్ర ప్రశంసనీయం:
ప్రజా సమస్యలను వెలుగులోకి తెచ్చి అధికారుల దృష్టికి తీసుకెళ్లడంలో పత్రికలు, మీడియా చూపుతున్న చొరవ అభినందనీయమని రమేశ్ రెడ్డి కొనియాడారు. సమస్యను వెలికితీసిన మీడియా ప్రతినిధులకు ప్రత్యేక ధన్యవాదాలు తెలిపారు. అధికారులు, ప్రజాప్రతినిధులు, మీడియా సమన్వయంతో పనిచేసినప్పుడే ప్రజలకు సత్వర న్యాయం చేకూరుతుందని, భవిష్యత్తులోనూ అధికారులు ఇదే బాధ్యతాయుత వైఖరిని కొనసాగించాలని ఆయన ఆకాంక్షించారు.
