Rain Alert.. 11 జిల్లాల్లో స్కూళ్లకు సెలవు

పొంగుతున్న వాగులు, కాలువలు.. ప్రజలకు అధికారులు హెచ్చరిక

అమరావతి: అర్నబ్ తుఫాన్ ఆంధ్రప్రదేశ్‌ను అతలాకుతలం చేసింది. భారీ వర్షాలు, ఈదురుగాలుల ప్రభావంతో తీర ప్రాంతాల్లో జనజీవనం అస్తవ్యస్తంగా మారింది. వేలాది ఎకరాల్లో పంటలు నీట మునగడంతో రైతులకు తీవ్ర నష్టం వాటిల్లింది. విశాఖపట్నం సహా పలు తీర ప్రాంతాల్లో చెట్లు, విద్యుత్ స్తంభాలు నేలకొరిగాయి. లోతట్టు ప్రాంతాలు జలమయమయ్యాయి. తుఫాన్ తీరం దాటినప్పటికీ దాని ప్రభావం పూర్తిగా తగ్గకపోవడంతో ప్రజల్లో ఆందోళన నెలకొంది. తీరం దాటిన అర్నబ్ క్రమంగా బలహీనపడుతున్నప్పటికీ వర్షాల ముప్పు కొనసాగుతోందని వాతావరణ శాఖ తెలిపింది. తుఫాన్ బలహీనపడి తీవ్ర వాయుగుండంగా మారిన నేపథ్యంలో గురువారం ఆంధ్రప్రదేశ్‌లోని పలు జిల్లాలకు Rain Alert జారీ చేసింది. ఉరుములు, మెరుపులతో కూడిన భారీ వర్షాలు, బలమైన ఈదురుగాలులు వీచే అవకాశం ఉందని అధికారులు అంచనా వేశారు.

ఈ జిల్లాల్లో భారీ వర్షాలు.. ప్రజలకు హెచ్చరిక

శ్రీకాకుళం, మన్యం, విజయనగరం జిల్లాల్లో ఒకట్రెండు ప్రాంతాల్లో భారీ వర్షాలు కురిసే అవకాశం ఉందని APSDMA ఎండీ ప్రఖర్ జైన్ తెలిపారు. మిగిలిన ప్రాంతాల్లో తేలికపాటి నుంచి మోస్తరు వర్షాలు పడవచ్చని వెల్లడించారు. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని సూచించారు. భారీ వర్షాల కారణంగా Flash Floods సంభవించే ప్రమాదం ఉందని అధికారులు హెచ్చరించారు. లోతట్టు ప్రాంతాల్లో నివసించే ప్రజలు ముందస్తు జాగ్రత్తలు తీసుకోవాలని సూచించారు. పొంగిపొర్లుతున్న వాగులు, కాలువలను దాటేందుకు ప్రయత్నించవద్దని స్పష్టం చేశారు. అత్యవసర పరిస్థితులను ఎదుర్కొనేందుకు 16 NDRF, 11 SDRF బృందాలు సహాయక చర్యలకు సిద్ధంగా ఉన్నట్లు APSDMA వెల్లడించింది.

11 జిల్లాల్లో స్కూళ్లకు సెలవు

తుఫాన్ ప్రభావం, భారీ వర్షాల అంచనాల నేపథ్యంలో 11 జిల్లాల్లోని పాఠశాలలకు గురువారం సెలవు ప్రకటించినట్లు అధికారులు తెలిపారు. విజయనగరం, విశాఖపట్నం, అల్లూరి సీతారామరాజు, ఏలూరు, పోలవరం, తూర్పుగోదావరి, పశ్చిమగోదావరి, కోనసీమ, కృష్ణా, అనకాపల్లి, కాకినాడ జిల్లాల్లో Schools Holiday అమల్లో ఉంటుందని పేర్కొన్నారు. మిగిలిన జిల్లాల్లో పాఠశాలలు యథావిధిగా కొనసాగనున్నాయి. విద్యార్థులు, తల్లిదండ్రులు స్థానిక అధికారుల సూచనలను పాటించాలని సూచించారు.

తెలంగాణలోనూ Rain Alert

అర్నబ్ తుఫాన్ ప్రభావంతో తెలంగాణలోని పలు ప్రాంతాల్లోనూ వర్షాలు కురిసే అవకాశం ఉందని వాతావరణ శాఖ తెలిపింది. ఉరుములు, మెరుపులతో కూడిన జల్లులు పడవచ్చని, కొన్ని ప్రాంతాల్లో గంటకు 40 కిలోమీటర్ల వేగంతో ఈదురుగాలులు వీచే అవకాశం ఉందని వెల్లడించింది. ప్రజలు వాతావరణ పరిస్థితులను గమనిస్తూ అప్రమత్తంగా ఉండాలని అధికారులు సూచిస్తున్నారు. తుఫాన్ బలహీనపడుతున్నప్పటికీ వర్షాలు, ఈదురుగాలుల ప్రభావం ఉన్న ప్రాంతాల్లో ప్రజలు నిర్లక్ష్యం చేయవద్దని అధికారులు హెచ్చరిస్తున్నారు. ముఖ్యంగా లోతట్టు ప్రాంతాల ప్రజలు, రైతులు, ప్రయాణికులు స్థానిక అధికారుల సూచనలు పాటిస్తూ తగిన జాగ్రత్తలు తీసుకోవాలి.