షాకింగ్ ట్విస్ట్.. నేరుగా సెమీస్లోకి భారత్
ఏషియన్ గేమ్స్లో వింత పరిణామం
నిస్సిన్: ఏషియన్ గేమ్స్ 2026లో భారత్–ఆఫ్ఘనిస్థాన్(india vs afghanistan) మధ్య జరగాల్సిన పురుషుల క్రికెట్ క్వార్టర్ఫైనల్ మ్యాచ్కు వర్షం అడ్డంకిగా మారింది. భారీ వర్షం కారణంగా కనీసం టాస్ కూడా వేయలేని పరిస్థితి ఏర్పడింది. చాలాసేపు వేచి చూసినప్పటికీ వాతావరణం అనుకూలించకపోవడంతో మ్యాచ్ను పూర్తిగా రద్దు చేయాల్సి వచ్చింది. మ్యాచ్ జరుగుతుందన్న ఆశలున్నప్పటికీ.. నిస్సిన్లో ఎడతెరిపి లేకుండా కురిసిన వర్షం ఆ అవకాశాలను దెబ్బతీసింది. చివరకు అంపైర్లు, మ్యాచ్ అధికారులు మ్యాచ్ను రద్దు చేస్తున్నట్లు ప్రకటించారు.
ఆడకుండానే సెమీస్ బెర్త్
మ్యాచ్ రద్దు కావడంతో శ్రేయస్ అయ్యర్ నేతృత్వంలోని భారత జట్టు నేరుగా సెమీఫైనల్కు(Asian Games India semifinal) చేరింది. భారత్కి ఉన్న మెరుగైన ICC T20I ర్యాంకింగ్ కారణంగా తదుపరి దశకు అర్హత లభించింది. అక్టోబర్ 1న జరిగే సెమీఫైనల్లో భారత్.. శ్రీలంక లేదా నేపాల్లో ఏదో ఒక జట్టుతో తలపడనుంది. అంటే క్వార్టర్ఫైనల్లో బరిలోకి దిగకుండానే భారత్కు సెమీస్ అవకాశం దక్కింది. ఇదే పరిస్థితి మరో క్వార్టర్ఫైనల్లోనూ కనిపించింది. పాకిస్థాన్–హాంకాంగ్ మధ్య జరగాల్సిన మ్యాచ్ కూడా వర్షం కారణంగా రద్దయింది. మెరుగైన ICC T20I ర్యాంకింగ్ ఆధారంగా పాకిస్థాన్ సెమీఫైనల్కు చేరింది.
జపాన్ అనుభవంపై బిష్ణోయ్
మ్యాచ్కు ముందు భారత స్పిన్నర్ రవిబిష్ణోయ్ జపాన్లో తన అనుభవాన్ని పంచుకున్నాడు. గతంలో హాంగ్జౌలో జరిగిన గేమ్స్లో పాల్గొన్న అనుభవం తనకు ఉందని చెప్పిన ఆయన.. జపాన్లోని గేమ్స్ విలేజ్లో ఇతర క్రీడాకారులతో కలిసి ఉండటం ప్రత్యేకమైన అనుభూతి అని పేర్కొన్నాడు. జపాన్లో బుల్లెట్ ట్రైన్ ప్రయాణం కూడా తనకు మంచి అనుభవంగా నిలిచిందని బిష్ణోయ్ తెలిపాడు. సుమారు 400 కిలోమీటర్ల ప్రయాణాన్ని గంటా 13 నిమిషాల్లో పూర్తి చేయడం చాలా వేగంగా అనిపించిందని చెప్పాడు. మ్యాచ్ ఆడే అవకాశం రాకపోవడంతో భారత ఆటగాళ్లు ఇప్పుడు సెమీఫైనల్పై దృష్టి పెట్టాల్సి ఉంది. అక్టోబర్ 1న జరిగే కీలక పోరులో భారత్ తన అసలు సత్తా చూపించేందుకు సిద్ధమవుతోంది.
