అద్వానీ ఆరోగ్యంపై టెన్షన్‌కు తెర
ఎల్‌కే అద్వానీ ఆస్పత్రి నుంచి డిశ్చార్జ్.. 98 ఏళ్ల నేత ఆరోగ్యంపై కీలక అప్‌డేట్!
న్యూఢిల్లీ: బీజేపీ సీనియర్ నేత, మాజీ ఉప ప్రధాని ఎల్‌కే అద్వానీ ఆరోగ్యంపై కీలక అప్‌డేట్ వెలువడింది. ఛాతీ ఇన్ఫెక్షన్‌తో న్యూఢిల్లీలోని ఇందర్‌ప్రస్థ అపోలో ఆస్పత్రిలో చేరిన ఆయన ఆరోగ్యం మెరుగుపడటంతో సోమవారం డిశ్చార్జ్ చేస్తున్నట్లు ఆస్పత్రి ప్రకటించింది. 98 ఏళ్ల అద్వానీకి వైద్యుల పర్యవేక్షణలో చికిత్స అందించగా, ఆయన ఆరోగ్య పరిస్థితిలో మెరుగుదల కనిపించిందని వెల్లడించింది.
Chest Infectionతో ఆస్పత్రిలో చేరిక
ఆస్పత్రి ప్రకటన ప్రకారం.. అక్టోబర్ 16న సాయంత్రం ఛాతీ ఇన్ఫెక్షన్ కారణంగా అద్వానీని Indraprastha Apollo Hospitalలో చేర్చారు. న్యూరాలజీ సీనియర్ కన్సల్టెంట్ డాక్టర్ వినీత్ సూరి పర్యవేక్షణలో ఆయనకు వైద్య సేవలు అందించారు. చికిత్స అనంతరం ఆరోగ్య పరిస్థితి మెరుగుపడటంతో డిశ్చార్జ్ నిర్ణయం తీసుకున్నట్లు ఆస్పత్రి తెలిపింది. అంతకుముందు కేంద్ర ఆరోగ్యశాఖ మంత్రి జేపీ నడ్డా కూడా ఆస్పత్రికి వెళ్లి అద్వానీ ఆరోగ్య పరిస్థితిని అడిగి తెలుసుకున్నారు.
భారత రాజకీయాల్లో అద్వానీ కీలక పాత్ర
ఎల్‌కే అద్వానీ భారత రాజకీయాల్లో అత్యంత ప్రముఖ నాయకుల్లో ఒకరు. బీజేపీని దేశవ్యాప్తంగా బలోపేతం చేయడంలో ఆయన కీలక పాత్ర పోషించారు. 1990లో చేపట్టిన Ram Rath Yatra భారత రాజకీయాల్లో ఒక ముఖ్యమైన మలుపుగా నిలిచింది. అటల్ బిహారీ వాజ్‌పేయి ప్రభుత్వంలో 2002 నుంచి 2004 వరకు దేశ ఉప ప్రధానిగా సేవలందించారు. అంతేకాకుండా కేంద్ర హోంమంత్రిగా కూడా బాధ్యతలు నిర్వహించారు. ప్రజా జీవితానికి చేసిన సేవలకు గుర్తింపుగా 2015లో పద్మవిభూషణ్, 2024లో దేశ అత్యున్నత పౌర పురస్కారమైన Bharat Ratna అందుకున్నారు. గతంలోనూ వయోభారానికి సంబంధించిన ఆరోగ్య సమస్యలతో ఆస్పత్రిలో చికిత్స పొందిన అద్వానీ, తాజాగా కోలుకోవడంతో ఆయన అభిమానులు, పార్టీ శ్రేణులకు ఊరట లభించింది.
