శివంపేట పోలీస్ స్టేషన్‌ను ఆకస్మిక తనిఖీ

మెదక్ జిల్లా  ఎస్పీ డి వి శ్రీనివాసరావు

శివంపేట్ అక్టోబర్ 8 ( విజయక్రాంతి ): మెదక్ జిల్లా ఎస్పీ డి వి శ్రీనివాసరావు (Medak SP Srinivasa Rao)శివంపేట పోలీస్ స్టేషన్‌ను సందర్శించి విస్తృత తనిఖీలు చేపట్టారు. స్టేషన్ పరిపాలనా వ్యవహారాలు, రికార్డుల నిర్వహణ, శాంతిభద్రతల పరిరక్షణ తీరును ఆయన క్షేత్రస్థాయిలో పరిశీలించారు.

రికార్డులు & దస్త్రాల సమగ్ర పరిశీలన

కేసు డైరీలు & రిజిస్టర్లు స్టేషన్‌లోని క్రైమ్ రికార్డులు, జనరల్ డైరీ (GD), ఎఫ్‌ఐఆర్ కాపీలు, ముద్దాయిల రిమాండ్ ఫైళ్లను క్షుణ్ణంగా తనిఖీ చేశారు. పెండింగ్ కేసులు యూఐ (అండర్ ఇన్వెస్టిగేషన్) కేసులు, దీర్ఘకాలికంగా పెండింగ్‌లో ఉన్న నాన్-బెయిలబుల్ వారెంట్లు (NBW) మరియు సీసీ నంబర్లు రాని కేసులపై ఎస్సై మధుకర్ రెడ్డి నీ వివరాలు అడిగి తెలుసుకున్నారు. నాణ్యమైన దర్యాప్తుతో ఫైళ్లను త్వరగా కోర్టుకు సమర్పించాలని ఆదేశించారు.

సిబ్బంది విధులు

స్టేషన్ సిబ్బంది విధి నిర్వహణ, వర్టికల్స్ అమలు, రిసెప్షన్ నిర్వహణన పై సంతృప్తి వ్యక్తం చేశారు ఈ సంవత్సర కాలంలో  కోర్టుల యందు 3 జీవితకాల శిక్ష విధించేలా తీర్పులు వచ్చేలా చేసిన ఎస్ఐని మరియు సిబ్బంది ప్రత్యేకంగా అభినందించారు

ఫిర్యాదుదారులకు తక్షణ స్పందన ఠాణాకు తమ సమస్యల పరిష్కారం కోసం వచ్చే బాధితులతో మర్యాదపూర్వకంగా వ్యవహరించాలని, ముఖ్యంగా మహిళలు, వృద్ధులు మరియు చిన్నారుల ఫిర్యాదులపై తక్షణమే స్పందించి ఎఫ్‌ఐఆర్ నమోదు చేయాలని స్పష్టం చేశారు.

* గస్తీ & విజిబుల్ పోలీసింగ్ *

మండల పరిధిలోని ప్రధాన కూడళ్లు, గ్రామాలు, అంతర్-జిల్లా సరిహద్దు మార్గాల్లో బ్లూకోల్ట్స్ మరియు పెట్రోలింగ్ మొబైల్ నిరంతరం తిరగాలని సూచించారు. రాత్రి గస్తీని ముమ్మరం చేసి అనుమానితులను క్షుణ్ణంగా తనిఖీ చేయాలన్నారు.

* నేరాల నియంత్రణ & నిఘా*:

పాత నేరస్థుల కదలికలపై నిరంతర నిఘా ఉంచాలని, సీసీటీవీ నెట్‌వర్క్ (నేను సైతం ప్రాజెక్ట్) విస్తరణకు గ్రామాల్లో ప్రజలు, వ్యాపారులకు అవగాహన కల్పించాలని తెలిపారు.

* మాదకద్రవ్యాలు & అసాంఘిక శక్తులపై ఉక్కుపాదం* 

గంజాయి, అక్రమ మద్యం, జూదం వంటి చట్టవ్యతిరేక కార్యకలాపాలపై కఠినంగా వ్యవహరించాలని, గ్రామాల్లో శాంతికి విఘాతం కలిగించే వారిని ఉపేక్షించవద్దని హెచ్చరించారు.

* సైబర్ నేరాలపై అవగాహన*

పెరుగుతున్న ఆన్‌లైన్ మోసాల పట్ల గ్రామీణ ప్రజలకు అవగాహన సదస్సులు నిర్వహించాలని, బాధితులు వెంటనే 1930 లేదా సైబర్ పోర్టల్‌ను ఆశ్రయించేలా చైతన్యపరచాలని దిశానిర్దేశం చేశారు.

పోలీస్ స్టేషన్ పరిసరాలు పరిశుభ్రంగా ఉంచాలని, యూనిఫాం నిబంధనలు పాటించాలని సిబ్బందికి ఆదేశాలు జారీ చేశారు. ఈ తనిఖీ కార్యక్రమంలో తూప్రాన్ సీఐ వెంకటరాజు గౌడ్ ఎస్ బి సి ఐ సందీప్ రెడ్డి మరియు స్థానిక సబ్-ఇన్‌స్పెక్టర్ (ఎస్సై) మధుకర్ రెడ్డి సిబ్బంది పాల్గొన్నారు.