ఆదివారాల్లో ఫ్రీ జర్నీ.. ఆర్టీసీ బంపర్ ఆఫర్!

హైదరాబాద్, నవంబర్ 14 (విజయక్రాంతి): తెలంగాణ రాష్ట్ర రోడ్డు రవాణా సంస్థ (TGSRTC) ప్రయాణికులకు కీలక శుభవార్త చెప్పింది. నెలవారీ సీజన్ టికెట్ల (Monthly Season Tickets) విధానంలో ప్రత్యేక రాయితీలు, కొత్త సదుపాయాలను ప్రవేశపెట్టింది. మహిళలతో పాటు పురుష ప్రయాణికులకు కూడా ప్రయోజనం కలిగేలా కొత్త విధానాన్ని రూపొందించింది. ప్రయాణికులు తక్కువ ఖర్చుతో మరింత సౌకర్యవంతంగా ప్రయాణించేందుకు ఈ నిర్ణయం తీసుకున్నట్లు ఆర్టీసీ అధికారులు వెల్లడించారు.

మహిళలకు సగం ధరకే నెలవారీ పాస్!

మహాలక్ష్మి పథకం (Mahalakshmi Scheme) కింద మహిళలకు ఇప్పటికే సిటీ ఆర్డినరీ, ఎక్స్‌ప్రెస్ బస్సులతో పాటు జిల్లాల్లో పల్లె వెలుగు, ఎక్స్‌ప్రెస్ బస్సుల్లో ఉచిత ప్రయాణ సదుపాయం అందుబాటులో ఉంది. అయితే మెట్రో, రాజధాని, డీలక్స్ బస్సుల్లో ప్రయాణించాలంటే టికెట్ లేదా నెలవారీ పాస్ కొనుగోలు చేయాల్సి వస్తోంది. ఈ నేపథ్యంలో మహిళలకు ప్రత్యేక రాయితీని ప్రకటించింది. ఇకపై మెట్రో, రాజధాని, డీలక్స్ బస్సుల్లో నెలవారీ రూట్ పాస్ (Monthly Route Pass) తీసుకునే మహిళలు 15 రోజుల చార్జీ చెల్లిస్తే సరిపోతుంది. అంటే ప్రస్తుతం ఉన్న పాస్ ధరలో సగం మొత్తానికే నెల రోజుల ప్రయాణ సదుపాయం కల్పించనున్నారు.

నెలవారీ పాస్ ధరలను మరింత తగ్గించే ఉద్దేశంతో టోల్ ప్లాజా చార్జీల లెక్కింపులోనూ మార్పులు చేశారు. ప్రస్తుతం 25 రోజుల టోల్ చార్జీలను పరిగణనలోకి తీసుకుంటుండగా, ఇకపై 20 రోజుల చార్జీలనే లెక్కించనున్నారు.సాధారణ ప్రయాణికులకు మెరుగైన ప్రయాణ సదుపాయం కల్పించేందుకు డీలక్స్ నెలవారీ సీజన్ టికెట్లను ప్రవేశపెడుతున్నారు. ఈ పాస్‌లు ఈ-డీలక్స్ (E-Deluxe) బస్సుల్లో కూడా చెల్లుబాటు కానున్నాయి. హైదరాబాద్‌, వరంగల్‌, కరీంనగర్‌, నల్గొండ, నిజామాబాద్‌ నగరాల్లో నెలవారీ సిటీ పాస్ (Monthly City Pass) కలిగిన ప్రయాణికులకు మరో వెసులుబాటు కల్పించారు. వీరు ఆదివారాల్లో అన్ని కేటగిరీల సిటీ బస్సుల్లో ఉచితంగా ప్రయాణించవచ్చు. అయితే ఈ సదుపాయం గ్రేటర్ హైదరాబాద్ జోన్ పరిధిలోని పుష్పక్ ఎయిర్‌పోర్ట్ బస్సులకు, ఇతర ప్రభుత్వ సెలవు దినాలకు వర్తించదు.

ప్రయాణికుల సౌకర్యార్థం కాంబి టికెట్ (Combination Ticket) విధానాన్ని కూడా అందుబాటులోకి తెచ్చారు. ప్రతి ప్రయాణానికి అదనంగా రూ.20 చెల్లించి ఈ టికెట్ తీసుకుంటే అదనపు బస్సు సర్వీసుల్లో ప్రయాణించవచ్చు. పల్లె వెలుగు నెలవారీ పాస్ ఉన్నవారు ఎక్స్‌ప్రెస్, ఈ-ఎక్స్‌ప్రెస్ బస్సుల్లో ప్రయాణించవచ్చు. ఎక్స్‌ప్రెస్ నెలవారీ పాస్ ఉన్నవారు డీలక్స్, ఈ-డీలక్స్ బస్సుల్లో ప్రయాణించవచ్చు.

ఎక్కువ కాలానికి సీజన్ టికెట్లు తీసుకునే ప్రయాణికులకు కూడా ఆర్టీసీ అదనపు ప్రయోజనాలు ప్రకటించింది. రెండు నెలల సీజన్ పాస్ తీసుకుంటే అదనంగా 5 రోజుల గడువు (Validity) కల్పిస్తారు. మూడు నెలల సీజన్ పాస్ తీసుకుంటే అదనంగా 10 రోజుల గడువు కల్పిస్తారు. మొత్తంగా మహిళలకు సగం ధరకే నెలవారీ రూట్ పాస్, పురుష ప్రయాణికులకు కొత్త డీలక్స్ పాస్‌లు, ఆదివారాల్లో ఉచిత ప్రయాణం, కాంబి టికెట్లు, అదనపు గడువు వంటి సదుపాయాలతో టీజీఎస్‌ఆర్టీసీ నెలవారీ పాస్ విధానంలో మార్పులు తీసుకొచ్చింది. ఈ కొత్త వెసులుబాట్లతో నిత్యం బస్సుల్లో ప్రయాణించే వారికి ప్రయాణ ఖర్చులు తగ్గే అవకాశం ఉంది.