డిఫెన్స్ హబ్‌గా హైదరాబాద్
రక్షణ రంగంలో తెలంగాణ హవా.. రేవంత్ మాస్టర్ ప్లాన్
హైదరాబాద్: భారతదేశ రక్షణ రంగాన్ని ప్రపంచ స్థాయిలో అగ్రగామిగా తీర్చిదిద్దడంలో తెలంగాణ కీలక పాత్ర పోషించాలని ముఖ్యమంత్రి రేవంత్ రెడ్డి(Chief Minister Revanth Reddy) పిలుపునిచ్చారు. దేశానికి అవసరమైన రక్షణ సాంకేతికతను దిగుమతి చేసుకునే స్థాయి నుంచి స్వదేశంలోనే తయారు చేయడంతో పాటు ఇతర దేశాలకు ఎగుమతి చేసే స్థాయికి భారత్ ఎదగాలని ఆకాంక్షించారు. ఈ లక్ష్యంతో తెలంగాణను దేశంలోనే ప్రధాన Defence Manufacturing Hubగా అభివృద్ధి చేయాలని స్పష్టం చేశారు. #TelanganaRising2047 విజన్‌కు అనుగుణంగా త్వరలోనే Aerospace and Defence Policy 2.0 తీసుకురానున్నట్లు ప్రకటించారు.
Invest Telangana Global Summit 2026లో భాగంగా హైదరాబాద్‌లోని తాజ్ ఫలక్‌నుమా ప్యాలెస్‌లో నిర్వహించిన కార్యక్రమంలో సీఎం రేవంత్ రెడ్డి Raksha Expo 2026 Curtain Raiserను ప్రారంభించి, లోగోను ఆవిష్కరించారు. ఈ సమావేశంలో ఉప ముఖ్యమంత్రి భట్టి విక్రమార్క, మంత్రులు ఉత్తమ్ కుమార్ రెడ్డి, దుద్దిళ్ల శ్రీధర్ బాబు, ప్రభుత్వ ఉన్నతాధికారులు, రక్షణ రంగ పారిశ్రామికవేత్తలు పాల్గొన్నారు. తెలంగాణలో పెట్టుబడులు పెట్టేందుకు ఇప్పటికే రూపొందించిన ప్రణాళికలను మరింత విస్తరించాలని పారిశ్రామికవేత్తలను సీఎం కోరారు. రాష్ట్రంలో పరిశ్రమల స్థాపనకు అవసరమైన ప్రభుత్వ సహకారం అందిస్తామని హామీ ఇచ్చారు.
దేశ రక్షణ పరిశ్రమకు తెలంగాణను అతిపెద్ద పారిశ్రామిక కేంద్రంగా తీర్చిదిద్దడమే లక్ష్యమని రేవంత్ రెడ్డి వెల్లడించారు. రక్షణ రంగంతో పాటు Aerospace, Space Technology, Cyber Security, Artificial Intelligence (AI), Drone Technology వంటి ఆధునిక రంగాల్లోనూ పెట్టుబడులకు విస్తృత అవకాశాలున్నాయని పేర్కొన్నారు. యుద్ధ రంగంలో డ్రోన్లు, రోబోటిక్స్, AI ఆధారిత వ్యవస్థలు కీలకంగా మారుతున్న నేపథ్యంలో సరికొత్త సాంకేతిక పరిజ్ఞానాన్ని అభివృద్ధి చేయాల్సిన అవసరం ఉందన్నారు. ఇందుకు అనుగుణంగా పరిశోధనలు, ఆవిష్కరణలు, తయారీ రంగాలకు ప్రభుత్వం ప్రోత్సాహం అందిస్తుందని తెలిపారు.
తెలంగాణ ఆర్థిక వ్యవస్థను 2034 నాటికి 1 ట్రిలియన్ డాలర్ల స్థాయికి, 2047 నాటికి 3 ట్రిలియన్ డాలర్ల స్థాయికి తీసుకెళ్లాలనే లక్ష్యంతో గతేడాది Telangana Rising 2047 Vision Document విడుదల చేసినట్లు సీఎం గుర్తుచేశారు. ప్రస్తుతం దేశ GDPలో తెలంగాణ వాటా సుమారు 5 శాతంగా ఉందని, 2047 నాటికి దానిని 10 శాతానికి పెంచాలని లక్ష్యంగా పెట్టుకున్నట్లు తెలిపారు. Defence Manufacturing, Aerospace, Space Technology రంగాలు ఈ అభివృద్ధిలో కీలక పాత్ర పోషిస్తాయని పేర్కొన్నారు. ఈ రంగాలకు చెందిన సంస్థలు, పరిశోధకులు, పెట్టుబడిదారులను ఒకే వేదికపైకి తీసుకొచ్చేందుకు Raksha Expoను అంతర్జాతీయ స్థాయి వేదికగా తీర్చిదిద్దాలని ప్రభుత్వం భావిస్తోందన్నారు.
రక్షణ పరిశ్రమలో హైదరాబాద్‌కు ప్రత్యేకమైన వ్యూహాత్మక ప్రాధాన్యం ఉందని సీఎం వివరించారు. నగరంలో అనేక కీలక పరిశోధనా సంస్థలు, రక్షణ రంగ సంస్థలు పనిచేస్తున్నాయని పేర్కొన్నారు. DRDO, HAL, BDL, MIDHANI, Tata, Airbus, Safran, Skyroot, Lockheed Martin, Bharat Forge వంటి సంస్థల ప్రతినిధులు ఈ రంగంలో సహకారానికి ముందుకు రావాలని కోరారు. వికారాబాద్ జిల్లా దామగుండం రిజర్వ్ ఫారెస్ట్‌లో నిర్మిస్తున్న Very Low Frequency (VLF) నేవల్ రాడార్ కేంద్రం ప్రాధాన్యాన్ని కూడా ప్రస్తావించారు. గతేడాది నిర్వహించిన గ్లోబల్ సమ్మిట్ విజయవంతమైందని పేర్కొన్న రేవంత్ రెడ్డి, ఈ ఏడాది డిసెంబర్ 7, 8, 9 తేదీల్లో హైదరాబాద్‌లోని Bharat Future Cityలో జరగనున్న Invest Telangana Global Summitలో పాల్గొనాలని పారిశ్రామికవేత్తలను ఆహ్వానించారు. రక్షణ, అంతరిక్ష, ఏరోస్పేస్ రంగాల్లో పెట్టుబడులు పెరిగితే తెలంగాణకు కొత్త పరిశ్రమలు, అత్యాధునిక సాంకేతికత, నైపుణ్య ఆధారిత ఉద్యోగ అవకాశాలు అందుబాటులోకి వచ్చే అవకాశం ఉంది.
