బర్త్‌డే సెలబ్రేషన్స్‌ బ్యాన్‌

ట్యాంక్‌బండ్‌పై బర్త్‌డే వేడుకలా? అర్ధరాత్రి కేక్ కటింగ్‌లు వద్దు!

హైదరాబాద్‌: నగరంలో అర్ధరాత్రి వేళ రోడ్లపై పుట్టినరోజు వేడుకలు నిర్వహించే వారికి పోలీసులు కీలక హెచ్చరిక జారీ చేశారు. ముఖ్యంగా ట్యాంక్‌బండ్‌తో పాటు ప్రధాన రహదారులు, చెరువులు, పార్కుల వద్ద Midnight Birthday Celebrations, కేక్ కటింగ్‌లు చేయవద్దని యువతకు, తల్లిదండ్రులకు హైదరాబాద్ సీపీ సజ్జనార్(Hyderabad CP Sajjanar) విజ్ఞప్తి చేశారు. క్షణిక ఆనందం కోసం నిర్లక్ష్యంగా వ్యవహరించి ప్రాణాలను ప్రమాదంలోకి నెట్టుకోవద్దని సూచించారు. రెండు రోజుల క్రితం ట్యాంక్‌బండ్‌పై అర్ధరాత్రి సుమారు 2 గంటల సమయంలో జరిగిన రోడ్డు ప్రమాదం తీవ్ర విషాదాన్ని మిగిల్చింది.

ఆరేళ్ల చిన్నారి పుట్టినరోజు రోజే ఆ పాపతో పాటు కుటుంబ సభ్యుడు మృత్యువాత పడిన ఘటన కలచివేసింది. ప్రమాదం జరిగిన వెంటనే పోలీసులు ఘటనా స్థలానికి చేరుకుని క్షతగాత్రులను ఆస్పత్రికి తరలించేందుకు ప్రయత్నించినప్పటికీ ప్రాణాలను కాపాడలేకపోయారు. ఈ ఘటన నేపథ్యంలో ప్రమాద స్థలాన్ని పోలీసు ఉన్నతాధికారులు పరిశీలించి, సంబంధిత ప్రభుత్వ విభాగాలతో కలిసి భద్రతా చర్యలపై సమీక్ష నిర్వహించారు. భవిష్యత్తులో ఇలాంటి ఘటనలు పునరావృతం కాకుండా Road Safety Measures మరింత పటిష్ఠం చేయడంపై దృష్టి సారించారు.

అర్ధరాత్రి వేడుకలతో ప్రమాదం పొంచి ఉంది!

అర్ధరాత్రి సమయంలో రహదారులపై జనసంచారం తక్కువగా ఉండటంతో వాహనాలు వేగంగా వెళ్లే అవకాశం ఉంటుంది. అలాంటి సమయంలో చిన్నపిల్లలను వెంటబెట్టుకుని రోడ్లపైకి రావడం ప్రమాదకరమని పోలీసులు హెచ్చరిస్తున్నారు. పుట్టినరోజు వేడుకలను(Birthday celebrations) ఇళ్లలో లేదా సురక్షితమైన ప్రదేశాల్లో నిర్వహించుకోవాలని సూచించారు. ట్యాంక్‌బండ్‌పై ఇలాంటి వేడుకలకు అనుమతి లేదని, గతంలోనే సంబంధిత అధికారులు ఆదేశాలు జారీ చేసినట్లు పోలీసులు గుర్తుచేశారు. పహారా నిర్వహిస్తూ వేడుకలకు వచ్చే వారిని వెనక్కి పంపిస్తున్నప్పటికీ, కొందరు అర్ధరాత్రి మళ్లీ అక్కడికి చేరుకుంటున్నారని తెలిపారు.

యువతకు పోలీసుల విజ్ఞప్తి

Hyderabad Traffic Police Safety Alert నేపథ్యంలో ట్యాంక్‌బండ్‌, చెరువులు, ప్రధాన రహదారులు, ఇతర బహిరంగ ప్రదేశాల్లో అర్ధరాత్రి వేడుకలకు దూరంగా ఉండాలని పోలీసులు కోరుతున్నారు. తల్లిదండ్రులు కూడా పిల్లల భద్రతపై ప్రత్యేక శ్రద్ధ చూపాలని సూచించారు. పుట్టినరోజు అనేది ఆనందంగా జరుపుకోవాల్సిన సందర్భమని, కానీ నిర్లక్ష్యం వల్ల కుటుంబాలు తీరని విషాదంలో మునిగిపోకూడదని పోలీసులు పేర్కొన్నారు. రహదారి భద్రతా నిబంధనలు పాటిస్తూ, ఇతరుల ప్రాణాలకు ముప్పు కలగకుండా వేడుకలు నిర్వహించుకోవాలని విజ్ఞప్తి చేశారు.