అస్సాంలో ఘోర రోడ్డు ప్రమాదం

ట్రావెలర్‌ను ఢీకొన్న ట్రైలర్!

విద్యార్థులతో సహా పలువురు మృతి.. 

ఆసుపత్రుల్లో క్షతగాత్రులకు చికిత్స

గువాహటి: అస్సాంలో జరిగిన ఘోర రోడ్డు ప్రమాదం తీవ్ర విషాదాన్ని మిగిల్చింది. గోలాఘాట్ జిల్లాలోని కజిరంగ సమీపం రోంగాజన్ వద్ద ప్రయాణికులతో వెళ్తున్న ట్రావెలర్ వాహనం ట్రైలర్‌ ట్రక్కును ఢీకొట్టింది. ఈ ఘటనలో పలువురు ప్రాణాలు కోల్పోగా, మరికొందరు తీవ్రంగా గాయపడ్డారు. మృతుల సంఖ్య 23కు చేరినట్లు అందిన సమాచారం చెబుతున్నప్పటికీ, ఈ సంఖ్యపై అధికారిక ధ్రువీకరణ రావాల్సి ఉంది.

ప్రమాద సమయంలో ట్రావెలర్‌లో కజిరంగ హైస్కూల్ విద్యార్థులతో సహా 35 మందికి పైగా ఉన్నట్లు ప్రాథమిక సమాచారం. ఢీకొన్న తీవ్రతకు వాహనం పూర్తిగా దెబ్బతిందని, కొందరు ప్రయాణికులు వాహనంలో చిక్కుకుపోవడంతో సహాయక చర్యలు చేపట్టారు.

ప్రమాదం జరిగిన వెంటనే స్థానికులు, అధికారులు సహాయక చర్యలు ప్రారంభించారు. గాయపడిన వారిని బోకాఖత్ సివిల్ ఆసుపత్రికి తరలించారు. మెరుగైన వైద్యం కోసం ఏడుగురిని జోర్హాట్ మెడికల్ కాలేజ్ ఆసుపత్రికి పంపించారు.

ఈ ట్రావెలర్ నాగావ్-గోలాఘాట్ మార్గంలో ప్రయాణిస్తున్నట్లు సమాచారం. అతివేగమే ప్రమాదానికి కారణమై ఉండవచ్చని ప్రాథమికంగా అధికారులు భావిస్తున్నారు. అయితే ప్రమాదానికి దారితీసిన కచ్చితమైన పరిస్థితులు తెలియాల్సి ఉంది. పోలీసులు కేసు నమోదు చేసి దర్యాప్తు చేపట్టినట్లు తెలిపారు. మృతుల పూర్తి వివరాలు, క్షతగాత్రుల ఆరోగ్య పరిస్థితిపై మరింత సమాచారం రావాల్సి ఉంది.