కూలిపోయిన పాములేరువాగు వంతెన

గ్రామస్తులు చూడటంతో తప్పిన పెను ప్రమాదం

ములకలపల్లి, సెప్టెంబర్ 23 (విజయక్రాంతి): భద్రాద్రి కొత్తగూడెం జిల్లా(Bhadradri Kothagudem district)లోని ములకలపల్లి మండలం ములకలపల్లి గ్రామం - జగన్నాధపురం గ్రామాల మధ్య రాజుపేట కాలనీ దగ్గర పాల్వంచ, దమ్మపేట ప్రధాన రహదారిపై ఉన్న పాములేరు వాగు పై ఉన్న వంతెన భారీ వర్షానికి వచ్చిన ప్రవాహానికి బుధవారం రాత్రి 8:30 గంటల సమయంలో సగం కూలిపోయింది.

ఈ సమయంలో వంతెనపై వాహనాల రాకపోకలు లేకపోవడంతో పెను ప్రమాదం తప్పింది.సమీపంలో ఉన్న రాజుపేట కాలనీ గ్రామస్తులు వంతెన దగ్గరకు చేరుకొని అటు నుంచి ఇటువైపు నుంచి వచ్చే వాహనదారులకు సూచనలు చేయడంతో ఎక్కడికక్కడే వాహనాలు నిలిచిపోయాయి.

ఈ సమయంలోనే జగన్నాధపురం నుంచి ములకలపల్లి వైపు వస్తున్న ఆటోను చూసిన గ్రామస్తులుఅరుపులు కేకలు వేయడంతో ఆటో డ్రైవర్ చాకచక్యంగా ఆటోను నిలిపివేయడంతో పెద్ద పెను ప్రమాదం తప్పింది.అందులో ఉన్న ప్రయాణికులు ఊపిరితో బయటపడ్డారు.రాజుపేట కాలనీ సమీపంలో పాల్వంచ- దమ్మపేట ప్రధాన రహదారిపై పాములేరు వాగుపై నిర్మించిన వంతెన శిథిలావస్థకు చేరుకున్నప్పటికీ సంబంధిత శాఖ అధికారులు పట్టించుకోకపోవడంతో వంతెన కూలిపోయిందని ప్రజలు ఆరోపించారు. ములకలపల్లి పోలీసులు ఘటనా స్థలానికి చేరుకొని రెండు వైపులా వాహనాలు రాకుండా సెక్యూరిటీగా సిబ్బందిని ఏర్పాటు చేశారు.