ఇందిరమ్మ ఇళ్లకు అనుమతులు ఇవ్వాలి

ఖానాపూర్ (విజయక్రాంతి): కడెం మండలం ఇస్లాంపూర్‌ గ్రామ పరిధిలోని కొలంగూడ గిరిజనులకు ప్రభుత్వం మంజూరు చేసిన ఇందిరమ్మ ఇళ్ల(Indiramma houses) నిర్మాణానికి అటవీశాఖ అధికారులు వెంటనే అనుమతులు ఇవ్వాలని డిమాండ్‌ చేస్తూ సీపీఐ (ఎంఎల్) మాస్‌లైన్ ప్రజాపంథా ఆధ్వర్యంలో నిర్మల్ లో నిరసన తెలిపారు. ఆర్డీవో కార్యాలయం ముందు ధర్నా నిర్వహించారు. ఆ పార్టీ ఉమ్మడి జిల్లా కార్యదర్శి నంది రామయ్య మాట్లాడుతూ.. గత ఏడాది నవంబర్‌లో కొలంగూడ గిరిజనులకు సుమారు 31 ఇందిరమ్మ ఇళ్ల నిర్మాణానికి ప్రభుత్వం మంజూరు ఇచ్చిందని తెలిపారు.

అయితే టైగర్‌ జోన్‌ పేరుతో అటవీశాఖ అధికారులు ఇళ్ల నిర్మాణాలను నిలిపివేశారని ఆవేదన వ్యక్తం చేశారు. సమస్యను ఖానాపూర్‌ ఎమ్మెల్యే, జిల్లా కలెక్టర్‌ దృష్టికి తీసుకెళ్లినా ఇప్పటివరకు పరిష్కారం కాలేదన్నారు. టైగర్‌ జోన్‌ పేరుతో పేద గిరిజనులను ఇబ్బందులకు గురిచేయడం సరికాదని పేర్కొన్నారు. ప్రభుత్వం మంజూరు చేసిన ఇళ్ల నిర్మాణానికి అటవీశాఖ అధికారులు వెంటనే అనుమతులు మంజూరు చేయాలని డిమాండ్‌ చేశారు. ఈ కార్యక్రమంలో నాయకులు రాజన్న రామ్ లక్ష్మణ్ గఫూర్ గంగన్న తదితరులు పాల్గొన్నారు.