సుప్రీంకోర్టుకు తెలంగాణ హైకోర్టు సీజే

న్యూఢిల్లీ: తెలంగాణ హైకోర్టు(Telangana High Court) ప్రధాన న్యాయమూర్తి జస్టిస్ అపరేశ్ కుమార్ సింగ్‌(Justice Aparesh Kumar Singh)కు కీలక పదోన్నతి లభించింది. ఆయనను సుప్రీంకోర్టు న్యాయమూర్తిగా నియమిస్తూ కేంద్ర ప్రభుత్వం తాజాగా నోటిఫికేషన్ జారీ చేసింది. సెప్టెంబర్ 28న సుప్రీంకోర్టు(Supreme Court) కొలీజియం జస్టిస్ అపరేశ్ కుమార్ సింగ్‌తో పాటు గుజరాత్ హైకోర్టు సీజే జస్టిస్ సునీతా అగర్వాల్, ఢిల్లీ హైకోర్టు సీజే జస్టిస్ దేవేంద్ర కుమార్ ఉపాధ్యాయ పేర్లను సుప్రీంకోర్టు న్యాయమూర్తులుగా నియమించేందుకు సిఫార్సు చేసింది. తాజాగా కేంద్రం ఆ నియామకాలను అధికారికంగా నోటిఫై చేసింది.

తెలంగాణ నుంచి సుప్రీంకోర్టుకు

జస్టిస్ అపరేశ్ కుమార్ సింగ్‌కు ఝార్ఖండ్ హైకోర్టు మూల హైకోర్టు. 2025 జూలైలో ఆయన తెలంగాణ హైకోర్టు ప్రధాన న్యాయమూర్తిగా బాధ్యతలు స్వీకరించారు. అంతకుముందు ఝార్ఖండ్, త్రిపుర హైకోర్టుల్లో కీలక బాధ్యతలు నిర్వహించారు. తాజా నియామకాలతో సుప్రీంకోర్టులో న్యాయమూర్తుల సంఖ్య ప్రమాణీకృత 38 మంది బలానికి చేరువ కానుంది.

ముగ్గురు న్యాయమూర్తులు ప్రమాణ స్వీకారం చేసిన తర్వాత కోర్టు వర్కింగ్ స్ట్రెంగ్త్ 37కి పెరగనుంది. తెలంగాణ హైకోర్టుకు నాయకత్వం వహించిన జస్టిస్ అపరేశ్ కుమార్ సింగ్ ఇక దేశ అత్యున్నత న్యాయస్థానంలో సేవలు అందించనుండటం న్యాయ వర్గాల్లో ప్రాధాన్యత సంతరించుకుంది.