ఘనంగా 174వ జయంతి వేడుకలు
- తెలంగాణ రాబిన్‌హుడ్‌ పండుగ సాయన్న..పేదల పాలిట ప్రజాబంధువు!
- నిజాం నిరంకుశ పాలన, దొరలు,భూస్వాముల దోపిడీపై పోరాడిన ప్రజా యోధుడు
మహబూబ్‌నగర్ జిల్లా, మహమ్మదాబాద్,అక్టోబర్ 22 విజయక్రాంతి: తెలంగాణ రాబిన్‌హుడ్‌గా(Telangana’s Robin Hood) పేరుగాంచిన పండుగ సాయన్న జయంతి వేడుకలను గురువారం మహమ్మదాబాద్ మండల కేంద్రంలోని మత్స్యశాఖ భవనంలో(Fisheries Department Building) ఘనంగా నిర్వహించారు. ఈ సందర్భంగా ముదిరాజ్ కుల పెద్దలు, నాయకులు పండుగ సాయన్న చిత్రపటానికి పూలమాలలు వేసి ఘనంగా నివాళులర్పించారు. ఆయన పోరాట స్ఫూర్తిని, పేద ప్రజల కోసం చేసిన సేవలను స్మరించుకున్నారు.
పేదల కోసం పోరాడిన ప్రజా యోధుడు
ఈ సందర్భంగా ముదిరాజ్ కుల పెద్దలు మాట్లాడుతూ.. పండుగ సాయన్న తెలంగాణ చరిత్రలో పేద ప్రజల పక్షాన నిలిచి, దొరలు, భూస్వాములు, పెత్తందారుల దోపిడీకి వ్యతిరేకంగా పోరాడిన ప్రజా యోధుడని కొనియాడారు. ముదిరాజ్ జాతిలో జన్మించిన ఆయన అణగారిన వర్గాలకు అండగా నిలిచి, ప్రజల హృదయాల్లో ప్రత్యేక స్థానం సంపాదించుకున్నారని పేర్కొన్నారు.
పండుగ సాయన్న 19వ శతాబ్దానికి చెందిన ప్రజా వీరుడిగా ప్రసిద్ధి చెందారు. మహబూబ్‌నగర్ జిల్లా నవాబుపేట మండలం మెరుగోనిపల్లి గ్రామంలో సాయమ్మ, అనంతయ్య దంపతులకు జన్మించిన ఆయన.. ఆనాటి గ్రామీణ ప్రాంతాల్లో నెలకొన్న సామాజిక అసమానతలు, భూస్వాముల దోపిడీని ప్రశ్నిస్తూ పోరాటం సాగించినట్లు జానపద కథనాలు చెబుతున్నాయి.
ధనవంతుల నుంచి తీసుకుని పేదలకు పంచిన రాబిన్‌హుడ్‌
నాటి గ్రామీణ తెలంగాణలో భూస్వాములు, దేశ్‌ముఖ్‌లు, పటేళ్ల ఆధిపత్యంతో సామాన్య ప్రజలు అనేక ఇబ్బందులు ఎదుర్కొనేవారు. ఈ పరిస్థితులను చూసి చలించిన సాయన్న పేదల పక్షాన నిలిచి పోరాట బాట పట్టారని పెద్దలు గుర్తుచేశారు. సంపన్నుల నుంచి సంపదను, ధాన్యాన్ని తీసుకుని పేదలకు పంచేవారనే కథనాల వల్ల ఆయనకు ‘తెలంగాణ రాబిన్‌హుడ్‌’ అనే పేరు వచ్చిందన్నారు.
ప్రజలపై జరుగుతున్న అన్యాయాలను ఎదిరించేందుకు ప్రత్యేక దళాన్ని ఏర్పాటు చేసుకుని ఆధిపత్య వర్గాలకు సవాల్‌ విసిరినట్లు చారిత్రక కథనాల్లో ప్రస్తావన ఉందన్నారు. ఆధిపత్య వర్గాలు ఆయనను బందిపోటుగా చిత్రీకరించినప్పటికీ, పేద ప్రజలు మాత్రం తమకు అండగా నిలిచిన ప్రజాబంధువుగా భావించారని పేర్కొన్నారు.
కుట్రలకు బలైన పోరాట యోధుడు
సాయన్నకు ప్రజల్లో పెరుగుతున్న ఆదరణను సహించలేని ఆధిపత్య వర్గాలు నిజాం పాలకులకు ఫిర్యాదు చేసి ఆయనను బంధింపజేసినట్లు కథనాలు చెబుతున్నాయి. ఆయన విడుదల కోసం వనపర్తి ప్రాంతాన్ని పాలించిన రాణి శంకరమ్మ ప్రయత్నించినప్పటికీ, చివరకు సాయన్న హత్యకు గురయ్యారని స్థానిక చారిత్రక గాథల్లో ప్రస్తావించబడిందని తెలిపారు.
ఆయన జీవితానికి సంబంధించిన అనేక వివరాలు జానపద కథనాలు, స్థానిక చారిత్రక రచనల ద్వారా ప్రచారంలో ఉన్నాయని, వాటిని మరింత పరిశోధించి భావితరాలకు అందించాల్సిన అవసరం ఉందని వక్తలు అభిప్రాయపడ్డారు.
భావితరాలకు స్ఫూర్తి సాయన్న చరిత్ర
పేదల సంక్షేమం, సామాజిక సమానత్వం, అణగారిన వర్గాల ఆత్మగౌరవం కోసం పోరాడిన పండుగ సాయన్న జీవితం నేటి తరానికి స్ఫూర్తిదాయకమని ముదిరాజ్ కుల పెద్దలు పేర్కొన్నారు. ఆయన పోరాట చరిత్రను యువతకు పరిచయం చేయాలని, ఆయన ఆశయాలకు అనుగుణంగా సమాజంలో ఐక్యత, సమానత్వం పెంపొందించేందుకు కృషి చేయాలని పిలుపునిచ్చారు.
ముఖ్యంగా మహబూబ్‌నగర్ జిల్లా ప్రజల హృదయాల్లో పండుగ సాయన్నకు ప్రత్యేక స్థానం ఉందని తెలిపారు. ఆయన జయంతి వేడుకలను అధికారికంగా నిర్వహించడం ద్వారా ప్రజా యోధుల చరిత్రను భావితరాలకు పరిచయం చేసే అవకాశం కలుగుతుందని పేర్కొన్నారు.
ఈ కార్యక్రమంలో గూళ్ల చెన్నప్ప, ఎ.శ్రీహరి, బీ.గోపాల్, ఎఫ్ఎ బచ్చన్న, కే.దస్తయ్య, నర్సింలు, సి.కేశవులు.జి.చంద్రయ్య తదితర ముదిరాజ్ కుల పెద్దలు పాల్గొన్నారు.
