నెక్నంపూర్లో అన్నప్రసాద వితరణ
నాలుగేళ్లుగా భక్తులకు సేవలందిస్తున్న వి ఆర్ 4 సహయోగ్ ట్రస్ట్
మణికొండ, సెప్టెంబర్ 20 (విజయక్రాంతి): వినాయక నిమజ్జనం(Vinayaka Immersion) ప్రకృతి చక్రానికి ప్రతీక అని వి ఆర్ 4 సహయోగ్ చారిటెబుల్ ట్రస్ట్(Sahayog Charitable Trust) మేనేజింగ్ ట్రస్టీ అందె లక్ష్మణ్ రావు అన్నారు. ప్రకృతి సిద్ధమైన మట్టి విగ్రహాల వినియోగం పర్యావరణ పరిరక్షణకు దోహదపడుతుందని పేర్కొన్నారు.
నార్సింగి మున్సిపల్ సర్కిల్ పరిధిలోని నెక్నంపూర్ చెరువు సమీపంలో వి ఆర్ 4 సహయోగ్ చారిటెబుల్ ట్రస్ట్ ఆధ్వర్యంలో ఆదివారం భక్తులకు అన్నప్రసాద వితరణ నిర్వహించారు. గత నాలుగేళ్లుగా ట్రస్ట్ ఆధ్వర్యంలో ఈ సేవా కార్యక్రమాన్ని కొనసాగిస్తున్నట్లు లక్ష్మణ్ రావు తెలిపారు. కార్యక్రమానికి స్థానిక భక్తులతో పాటు వివిధ పార్టీల నాయకులు హాజరయ్యారు. బీఆర్ఎస్ యువనేత కార్తీక్ రెడ్డి పాల్గొని భక్తులకు అన్నప్రసాదం అందించారు. ట్రస్ట్ ఆధ్వర్యంలో కొనసాగుతున్న సేవా కార్యక్రమాలను భక్తులు అభినందించారు.
