కరకట్ట సర్వేపై రైతుల అభ్యంతరం

శాస్త్రీయ అధ్యయనం తర్వాతే నిర్మాణంపై నిర్ణయం తీసుకోవాలి

పంట భూములు, ఉపాధి, వ్యాపారుల భవిష్యత్తుపై స్పష్టత ఇవ్వాలని డిమాండ్

బూర్గంపాడు, అక్టోబర్ 12 (విజయక్రాంతి): గోదావరి కరకట్ట నిర్మాణానికి(Godavari embankment construction) సంబంధించి రైతుల(Farmers') అభ్యంతరాలను పరిష్కరించకుండా అధికారులు సర్వే పనులు చేపట్టడంపై స్థానికుల్లో ఆందోళన వ్యక్తమవుతోంది. కరకట్ట నిర్మాణం వల్ల కలిగే ప్రయోజనాలు, నష్టాలపై సమగ్రంగా అధ్యయనం చేసి, రైతులు, రైతు కూలీలు, వ్యాపారులతో(Farmers, farm laborers, and traders) చర్చించిన తర్వాతే నిర్ణయం తీసుకోవాలని వారు కోరుతున్నారు.

గతంలో ప్రజలను సమావేశపరిచి కరకట్ట నిర్మాణంపై చర్చించినప్పటికీ, ఆ తర్వాత తమ అభిప్రాయాలను తెలుసుకోకుండా సర్వేలు ప్రారంభించారని రైతులు ఆరోపిస్తున్నారు. కరకట్ట నిర్మాణానికి ఏ శాస్త్రీయ ప్రమాణాలను ప్రాతిపదికగా తీసుకుంటున్నారో అధికారులు స్పష్టం చేయాలని డిమాండ్ చేస్తున్నారు. కిన్నెరసాని వరద ఉద్ధృతిని తట్టుకునేలా నిర్మాణం చేపట్టకపోతే భవిష్యత్తులో ప్రమాదాలు సంభవించే అవకాశం ఉందని ఆందోళన వ్యక్తం చేస్తున్నారు.

కిన్నెరసాని వరద ఉద్ధృతిపై ఆందోళన

గతంలో కిన్నెరసాని వరదల కారణంగా రైతులు తీవ్రంగా నష్టపోయారని, ప్రజలు ప్రాణాలు కోల్పోయిన ఘటనలు కూడా ఉన్నాయని వారు గుర్తుచేస్తున్నారు. వర్షాకాలంలో పాల్వంచ సమీపంలోని కిన్నెరసాని ప్రాజెక్టు నిండినప్పుడు నీటి విడుదల తప్పనిసరి అవుతుందని పేర్కొంటున్నారు. అలాంటి సమయంలో వరద ప్రవాహాన్ని ప్రతిపాదిత కరకట్ట ఎంతవరకు తట్టుకోగలదో నిపుణులతో అధ్యయనం చేయించాలని కోరుతున్నారు. పోలవరం ప్రాజెక్టు వద్ద వరదల సమయంలో ఎదురైన నిర్మాణపరమైన సమస్యలను ఉదాహరణగా ప్రస్తావిస్తూ, భారీ వ్యయంతో చేపట్టే పనుల్లో ముందస్తు జాగ్రత్తలు అవసరమని అభిప్రాయపడుతున్నారు.

పంట భూముల సంగతేంటి?

కరకట్ట నిర్మాణం జరిగితే దానికి అవతలివైపు ఉన్న పంట భూముల పరిస్థితి ఏమిటన్నది ముందుగా తేల్చాలని రైతులు కోరుతున్నారు. భూములు కోల్పోయే వారికి పరిహారం, మిగిలే భూముల సాగు పరిస్థితులు, వరదల ప్రభావం తదితర అంశాలపై స్పష్టమైన ప్రణాళిక ప్రకటించాలని డిమాండ్ చేస్తున్నారు. బూర్గంపాడులో నివసించే వారిలో అధిక శాతం మంది వ్యవసాయం, వ్యవసాయ కూలీ పనులపై ఆధారపడి జీవిస్తున్నారని పేర్కొంటున్నారు. భూములు కోల్పోతే కేవలం ఇళ్లు ఉన్నంత మాత్రాన కుటుంబాల జీవనోపాధి కొనసాగదని ఆవేదన వ్యక్తం చేస్తున్నారు.

వ్యాపారాలపై ప్రభావం పడుతుందా?

కరకట్ట నిర్మాణంతో చుట్టుపక్కల గ్రామాల ప్రజలు బూర్గంపాడు మీదుగా కాకుండా కట్టపై నుంచి భద్రాచలం వెళ్లే అవకాశం ఉందని, దీనివల్ల స్థానిక వ్యాపారాలకు నష్టం వాటిల్లవచ్చని వ్యాపారులు ఆందోళన చెందుతున్నారు. గతంలో బూర్గంపాడు మండలాన్ని వరద రక్షణ ప్యాకేజీలో చేర్చినట్లు అప్పటి ఆంధ్రప్రదేశ్ ప్రభుత్వ జలవనరుల శాఖ ప్రత్యేక ప్రధాన కార్యదర్శి శశిభూషణ్ కుమార్ తెలిపిన విషయాన్ని గుర్తుచేస్తున్నారు. ఈ నేపథ్యంలో రెండు రాష్ట్రాల మధ్య సమన్వయంతో సమస్యకు పరిష్కారం కనుగొనాలని కోరుతున్నారు.

ప్రజాభిప్రాయానికి ప్రాధాన్యం ఇవ్వాలి

కరకట్ట నిర్మాణానికి తాము వ్యతిరేకం కాదని, ప్రజలకు ఎలాంటి ఇబ్బందులు కలగకుండా పటిష్ఠమైన రక్షణ చర్యలు చేపట్టాలని రైతులు స్పష్టం చేస్తున్నారు. నిర్మాణానికి ముందు శాస్త్రీయ అధ్యయనం నిర్వహించి, రైతులు, రైతు కూలీలు, వ్యాపారులు, స్థానిక ప్రజల అభిప్రాయాలను పరిగణనలోకి తీసుకోవాలని సూచిస్తున్నారు. తెలంగాణ ప్రభుత్వం స్పందించి ఆంధ్రప్రదేశ్ ప్రభుత్వంతో చర్చించాలని, ఉమ్మడి ఖమ్మం ప్రాంతానికి చెందిన మంత్రులు జోక్యం చేసుకొని తమకు న్యాయం జరిగేలా చూడాలని విజ్ఞప్తి చేస్తున్నారు.