రుణమాఫీపై బీఆర్ఎస్‌కు మాట్లాడే హక్కు లేదు.. తుమ్మల ఫైర్

17-11-2026 | 06:11pm

హైదరాబాద్: రైతు రుణమాఫీ(Crop Loan Waiver) అంశంపై తెలంగాణ రాజకీయాల్లో మరోసారి మాటల యుద్ధం మొదలైంది. బీఆర్ఎస్ నేతల విమర్శలకు వ్యవసాయ శాఖ మంత్రి తుమ్మల నాగేశ్వరరావు(Minister Thummala Nageswara Rao) ఘాటుగా స్పందించారు. పదేళ్ల పాటు అధికారంలో ఉండి రూ.లక్ష రుణమాఫీని కూడా సక్రమంగా అమలు చేయలేని నేతలు ఇప్పుడు తమ ప్రభుత్వాన్ని ప్రశ్నించడం విడ్డూరంగా ఉందని వ్యాఖ్యానించారు.

రుణమాఫీపై మాట్లాడే నైతిక హక్కు బీఆర్ఎస్(BRS) నేతలకు లేదని తుమ్మల స్పష్టం చేశారు. గత ప్రభుత్వ హయాంలో రైతులకు ఇచ్చిన హామీని పూర్తిస్థాయిలో నెరవేర్చలేదని విమర్శించారు. విడతలవారీగా రుణమాఫీ చేయడంతో రైతులపై అదనపు వడ్డీ భారం పడిందని ఆరోపించారు.

కాంగ్రెస్ ప్రభుత్వం(Congress Government) ఎన్నికల సమయంలో ఇచ్చిన హామీ ప్రకారం రూ.2 లక్షల వరకు పంట రుణాలను మాఫీ చేసిందని మంత్రి తెలిపారు. ఒకేసారి ఇంత పెద్ద మొత్తంలో రుణమాఫీ చేసిన ఏకైక రాష్ట్ర ప్రభుత్వం తమదేనని పేర్కొన్నారు. రుణమాఫీ విషయంలో ప్రభుత్వం మాట తప్పలేదని, రైతులకు ఇచ్చిన హామీని అమలు చేసి చూపించామని తుమ్మల వెల్లడించారు. రైతుల సంక్షేమం కోసం తమ ప్రభుత్వం కట్టుబడి ఉందని స్పష్టం చేశారు. బీఆర్ఎస్ నేతలు గత పదేళ్ల పాలనలో రైతులకు చేసిన పనులను గుర్తు చేసుకోవాలని, ఇప్పుడు రాజకీయ విమర్శలు చేయడం మానుకోవాలని మంత్రి హితవు పలికారు.

మరిన్ని వార్తలు