KTRకు బిగ్ రిలీఫ్
నవంబర్ 6కు వాయిదా.. కేటీఆర్ పాస్‌పోర్ట్ కేసులో హైకోర్టు కీలక నిర్ణయం
హైదరాబాద్, అక్టోబర్ 28 (విజయక్రాంతి): Formula E Race నిధుల మళ్లింపు కేసులో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్‌కు(Kalvakuntla Taraka Rama Rao) తెలంగాణ హైకోర్టులో తాత్కాలిక ఊరట లభించింది. ఆయన పాస్‌పోర్ట్‌కు సంబంధించిన నోటీసుల వ్యవహారంలో యథాతథ స్థితి (Status Quo) కొనసాగించాలని న్యాయస్థానం మధ్యంతర ఉత్తర్వులు జారీ చేసింది. దీంతో పాస్‌పోర్ట్‌ను స్వాధీనం చేసుకునే ప్రక్రియపై ప్రస్తుతానికి తాత్కాలికంగా ముందడుగు పడకుండా నిలిచింది.
ఈ కేసు దర్యాప్తులో భాగంగా అవినీతి నిరోధక శాఖ (ACB) అధికారులు కేటీఆర్ పాస్‌పోర్ట్‌ను స్వాధీనం చేసుకోవాలని కోరుతూ ప్రాంతీయ పాస్‌పోర్ట్ కార్యాలయానికి (RPO) లేఖ రాశారు. ఈ అభ్యర్థన ఆధారంగా పాస్‌పోర్ట్ అధికారులు కేటీఆర్‌కు Show Cause Notice జారీ చేశారు. ఈ నోటీసుల చట్టబద్ధతను సవాలు చేస్తూ కేటీఆర్ High Courtను ఆశ్రయించారు. పాస్‌పోర్ట్‌కు సంబంధించి తీసుకున్న చర్యలను సవాలు చేస్తూ ఆయన దాఖలు చేసిన పిటిషన్‌పై న్యాయస్థానం విచారణ చేపట్టింది.
విచారణ అనంతరం నోటీసుల ప్రక్రియలో Status Quo కొనసాగించాలని ఆదేశించిన హైకోర్టు, ప్రతివాదులుగా ఉన్న ACB, పాస్‌పోర్ట్ అధికారులకు నోటీసులు జారీ చేసింది. తమ వాదనలను Counter Affidavit రూపంలో సమర్పించాలని సూచించింది. తదుపరి విచారణను నవంబర్ 6కు వాయిదా వేసింది. ఈ మధ్యంతర ఉత్తర్వులు కేటీఆర్‌కు తాత్కాలిక ఉపశమనాన్ని కల్పించినప్పటికీ, పాస్‌పోర్ట్ వివాదంపై తుది నిర్ణయం ఇంకా వెలువడాల్సి ఉంది. తదుపరి విచారణలో ప్రతివాదుల వాదనలు, న్యాయస్థానం తీసుకునే నిర్ణయం కీలకం కానున్నాయి.
