గాంధీ కాలేజీలో పరీక్షల వివాదం

19-11-2026 | 11:05am

హైదరాబాద్‌లోని గాంధీ మెడికల్ కాలేజీ (Gandhi Medical College) పీడియాట్రిక్స్ విభాగంలో చోటుచేసుకున్న వ్యవహారం వైద్య విద్యా వర్గాల్లో తీవ్ర చర్చకు దారితీసింది. ఏడుగురు పీజీ విద్యార్థులను కావాలనే ప్రాక్టికల్ పరీక్షల్లో ఫెయిల్ చేశారనే ఆరోపణలపై విచారణ జరిపిన కాళోజీ ఆరోగ్య విశ్వవిద్యాలయం (Kaloji University) ముగ్గురు అధ్యాపకులను యూనివర్సిటీ పరీక్షల విధులకు దూరం పెడుతూ ఉత్తర్వులు జారీ చేసింది.

ఈ వ్యవహారంలో పీడియాట్రిక్స్ విభాగాధిపతి డాక్టర్ వాసుదేవ్‌పై ఏడాది పాటు నిషేధం విధించారు. డాక్టర్ వేదవ్యాస్, డాక్టర్ రాజీవ్‌లను రెండేళ్ల పాటు యూనివర్సిటీ పరీక్షల విధుల్లో పాల్గొనకుండా ఆదేశించారు. కాళోజీ వర్సిటీ ఉపకులపతి (Vice Chancellor) ఆచార్య రమేష్ రెడ్డి ఈ నిర్ణయం తీసుకున్నారు.

పీజీ వైద్య విద్యలో థియరీ, ప్రాక్టికల్స్ రెండింటిలోనూ కనీసం 50 శాతం మార్కులు సాధిస్తేనే ఉత్తీర్ణులుగా పరిగణిస్తారు. అయితే తాజాగా నిర్వహించిన పరీక్షల్లో ఏడుగురు విద్యార్థులు థియరీలో మంచి మార్కులు సాధించినప్పటికీ ప్రాక్టికల్స్‌లో ఫెయిల్ అయ్యారు. కొందరికి థియరీలో ఏకంగా 65 నుంచి 75 శాతం వరకు మార్కులు వచ్చాయి.

దీంతో మంచి ప్రతిభ కనబరిచిన విద్యార్థులు ప్రాక్టికల్స్‌లో ఒకేసారి ఫెయిల్ కావడంపై అనుమానాలు వ్యక్తమయ్యాయి. ఈ నేపథ్యంలో పరీక్షల నిర్వహణపై ఉన్నతాధికారులు దృష్టి సారించి విచారణకు ఆదేశించారు. విచారణలో భాగంగా విద్యార్థులు పలు కీలక ఆధారాలను కమిటీ ముందు ఉంచినట్లు తెలిసింది. ముఖ్యంగా డాక్టర్ వేదవ్యాస్ గాంధీ మెడికల్ కాలేజీలో చేరిన కొద్దికాలానికే విద్యార్థులతో విభేదాలు ఏర్పడ్డాయని ఆరోపణలు వచ్చాయి. ప్రాక్టికల్స్ సమయంలో చూసుకుంటానని, పరీక్షల్లో ఫెయిల్ చేస్తానని తరచూ హెచ్చరించేవారని కొందరు విద్యార్థులు ఫిర్యాదు చేసినట్లు సమాచారం.

ఈ వ్యవహారంలో డాక్టర్ వేదవ్యాస్‌తో పాటు డాక్టర్ రాజీవ్, విభాగాధిపతి డాక్టర్ వాసుదేవ్ పాత్రపైనా విచారణ కమిటీ దృష్టి సారించింది. విద్యార్థులు సమర్పించిన వాయిస్ రికార్డులు (Voice Recordings) సహా ఇతర ఆధారాలను పరిశీలించిన అనంతరం ముగ్గురిపై చర్యలు తీసుకోవాలని నిర్ణయించినట్లు తెలిసింది.

మా కెరీర్ పరిస్థితి ఏంటి?

ఈ పరిణామంతో బాధిత విద్యార్థులు తీవ్ర ఆందోళన వ్యక్తం చేస్తున్నారు. పరీక్షల్లో ఫెయిల్ కావడంతో తమ పీజీ విద్య, భవిష్యత్తు కెరీర్ గందరగోళంలో పడిపోయాయని వాపోతున్నారు. ఒకవైపు విద్యార్థుల భవిష్యత్తు, మరోవైపు పరీక్షల పారదర్శకత (Exam Transparency)పై ఈ ఘటన పలు ప్రశ్నలను లేవనెత్తుతోంది.గాంధీ మెడికల్ కాలేజీలో మొదలైన ఈ వివాదం ఇప్పుడు ఉస్మానియా వైద్య విద్యా వర్గాల్లోనూ చర్చనీయాంశంగా మారింది. విద్యార్థుల భవిష్యత్తుకు నష్టం జరగకుండా యూనివర్సిటీ తదుపరి ఎలాంటి చర్యలు తీసుకుంటుందన్నది ఆసక్తికరంగా మారింది.

మరిన్ని వార్తలు