27 నుంచి ఈటల పాదయాత్ర
హైదరాబాద్: జవహర్‌నగర్ డంప్ యార్డు(Jawaharnagar Dump Yard)ను తరలించాలనే డిమాండ్‌తో బీజేపీ నేత, ఎంపీ ఈటల రాజేందర్(Etela Rajender) ఉద్యమానికి సిద్ధమయ్యారు. అక్టోబర్ 27 నుంచి పాదయాత్ర(Padayatra) ప్రారంభించనున్నట్లు ప్రకటించారు. డంప్ యార్డు పరిసర ప్రాంతాల్లో నివసించే ప్రజలు ఎదుర్కొంటున్న సమస్యలను ప్రభుత్వాల దృష్టికి తీసుకెళ్లడమే లక్ష్యంగా ఈ కార్యక్రమాన్ని చేపట్టనున్నట్లు తెలిపారు.
జవహర్‌నగర్ డంప్ యార్డు కారణంగా పరిసర ప్రాంతాల్లో నివసించే ప్రజలకు అనారోగ్య సమస్యలు ఎదురవుతున్నాయని ఈటల రాజేందర్ ఆరోపించారు. మిథేన్ గ్యాస్, వ్యర్థాల నిర్వహణకు సంబంధించిన సమస్యలపై ప్రభుత్వాలు తగిన చర్యలు తీసుకోవడం లేదని విమర్శించారు. స్థానిక ప్రజల ఇబ్బందులను పరిష్కరించేందుకు డంప్ యార్డును తరలించాలని డిమాండ్ చేశారు.
ఉద్యమ కార్యాచరణలో భాగంగా అక్టోబర్ 23న జవహర్‌నగర్ డంప్ యార్డు బాధితులతో సమావేశం నిర్వహించనున్నట్లు ఈటల వెల్లడించారు. స్థానికులు ఎదుర్కొంటున్న సమస్యలు, వారి అభిప్రాయాలు, డంప్ యార్డు తరలింపుపై తీసుకోవాల్సిన చర్యల గురించి చర్చించనున్నారు.
అక్టోబర్ 25న డంప్ యార్డు ప్రాంతంలోనే మేధావులు, పర్యావరణవేత్తలతో రౌండ్ టేబుల్ సమావేశం నిర్వహించనున్నట్లు తెలిపారు. పర్యావరణ ప్రభావాలు, ప్రజారోగ్య సమస్యలు, వ్యర్థాల నిర్వహణకు ప్రత్యామ్నాయ మార్గాలపై చర్చించనున్నారు. జవహర్‌నగర్ డంప్ యార్డు సమస్యను ప్రజా ఉద్యమంగా ముందుకు తీసుకెళ్లేందుకు ఈటల రాజేందర్ ప్రణాళిక సిద్ధం చేశారు. బాధితుల అభిప్రాయాలను సేకరించి, పర్యావరణ నిపుణుల సూచనలతో ప్రభుత్వంపై ఒత్తిడి తీసుకురావాలని భావిస్తున్నారు.
