జూపల్లికి నిరంజన్ రెడ్డి సవాల్
హైదరాబాద్: పాలమూరు–రంగారెడ్డి ఎత్తిపోతల పథకం పనుల జాప్యంపై మాజీ మంత్రి, బీఆర్ఎస్ నేత సింగిరెడ్డి నిరంజన్ రెడ్డి(BRS leader Singireddy Niranjan Reddy) కాంగ్రెస్ ప్రభుత్వాన్ని ప్రశ్నించారు. మంత్రి జూపల్లి కృష్ణారావు సవాల్‌ను స్వీకరిస్తున్నట్లు పేర్కొంటూ, ప్రాజెక్టు పనులు పూర్తి చేయడానికి ప్రభుత్వం తక్షణ చర్యలు చేపట్టాలని డిమాండ్ చేశారు.
నార్లాపూర్ రిజర్వాయర్ నుంచి ఎల్లూరు రిజర్వాయర్‌కు నీటిని తరలించే నిర్ణయం బీఆర్ఎస్ ప్రభుత్వ హయాంలో తీసుకున్నదేనని నిరంజన్ రెడ్డి పేర్కొన్నారు. రైతులకు సాగునీటి ప్రయోజనాలు అందించాలనే ఉద్దేశంతో పాలమూరు–రంగారెడ్డి ఎత్తిపోతల పథకాన్ని ఇతర రిజర్వాయర్లు, కాలువలతో అనుసంధానం చేసినట్లు వివరించారు.
శ్రీశైలం ప్రాజెక్టులో ప్రస్తుతం నీరు అందుబాటులో ఉందని, ప్యాకేజీ-3లో అడ్డంకిగా ఉన్న మట్టిని తొలగిస్తే నీటి ప్రవాహానికి మార్గం సుగమమవుతుందని ఆయన అభిప్రాయపడ్డారు. ఏదుల, వట్టెం రిజర్వాయర్ల వద్ద పంపులు సిద్ధంగా ఉన్నాయని, అవసరమైన పనులు చేపడితే కరివెన వరకు నీటిని తరలించే అవకాశం ఉందని తెలిపారు.
పాలమూరు–రంగారెడ్డి ప్రాజెక్టు పనులను గత మూడేళ్లుగా ఎందుకు నిలిపివేశారని, బీఆర్ఎస్ ప్రభుత్వ హయాంలో పిలిచిన కాలువల టెండర్లను ఎందుకు రద్దు చేశారని నిరంజన్ రెడ్డి ప్రశ్నించారు. తిరిగి టెండర్లు పిలవడంలో జాప్యం ఎందుకు జరుగుతోందని ప్రభుత్వాన్ని నిలదీశారు. తెలంగాణ సాగునీటి ప్రాజెక్టులకు వ్యతిరేకంగా పనిచేసిన అధికారులకు కీలక బాధ్యతలు అప్పగించడంపైనా ఆయన విమర్శలు చేశారు.
పాలమూరు ప్రాంత రైతులకు సాగునీరు అందించడమే ప్రధాన లక్ష్యమని నిరంజన్ రెడ్డి స్పష్టం చేశారు. ప్రాజెక్టు పెండింగ్ పనులు పూర్తి చేసేందుకు అవసరమైన నిధులను ప్రభుత్వం వెంటనే విడుదల చేయాలని కోరారు. అధికారం శాశ్వతం కాదని, ప్రజల ప్రయోజనాలే ముఖ్యమని పేర్కొంటూ, పాలమూరు ప్రజల హక్కుల కోసం తమ పోరాటం కొనసాగుతుందని తెలిపారు.
