వృద్ధాశ్రమంలో విద్యార్థుల ఆప్యాయ పలకరింపు

ఎల్లారెడ్డి, అక్టోబర్ 2 (విజయ క్రాంతి): మాకు చాలా సంతోషంగా ఉంది. మేము కన్న పిల్లలు మా దగ్గరకు రాలేకపోయినా.. పాఠశాల విద్యార్థులు వచ్చి పండ్లు పంపిణీ చేయడం ఆనందంగా ఉంది. మీ నాయనమ్మలను జాగ్రత్తగా చూసుకోండి బిడ్డలూ..” అంటూ వృద్ధాశ్రమంలోని వృద్ధులు విద్యార్థులను ఆశీర్వదించారు.

ఎల్లారెడ్డి పట్టణంలోని ప్రభుత్వ బాలికల పాఠశాలలో ఏడో తరగతి చదువుతున్న విద్యార్థినులకు తెలుగు పాఠ్యపుస్తకంలోని ‘నాయనమ్మ’ పాఠ్యాంశాన్ని ప్రత్యక్ష అనుభవం ద్వారా పరిచయం చేయాలని ఉపాధ్యాయులు నిర్ణయించారు. పాఠశాల ప్రధానోపాధ్యాయుడు నర్సింలు ఆధ్వర్యంలో తెలుగు ఉపాధ్యాయురాలు భాగ్యలక్ష్మి, నిర్మల, మాధురి నేతృత్వంలో లింగంపేట్ మండలంలోని జీవధాన్ వృద్ధాశ్రమాన్ని సందర్శించారు (Educational Visit).

అక్కడ నివసిస్తున్న వృద్ధులతో విద్యార్థినులు ముచ్చటించారు. వారి జీవితంలోని అనుభవాలు, కష్టసుఖాలను తెలుసుకున్నారు. కుటుంబ సభ్యులకు దూరంగా వృద్ధాశ్రమంలో ఉంటున్న వారి పరిస్థితులను చూసి కొందరు విద్యార్థినులు భావోద్వేగానికి గురయ్యారు (Emotional Experience). పాఠ్యపుస్తకంలో చదివిన విషయాలను ప్రత్యక్షంగా చూసిన విద్యార్థులు వృద్ధులతో ఆప్యాయంగా మాట్లాడి వారికి ధైర్యం చెప్పారు.

అనంతరం వృద్ధులకు పండ్లు, బిస్కెట్ ప్యాకెట్లు పంపిణీ చేశారు (Fruit Distribution). తమను పలకరించి, ప్రేమగా మాట్లాడిన విద్యార్థులను చూసి వృద్ధులు ఆనందం వ్యక్తం చేశారు. ఇంటి వద్ద ఉన్న నాయనమ్మలను ప్రేమగా చూసుకోవాలని, వృద్ధుల పట్ల ఆప్యాయత చూపాలని విద్యార్థులకు సూచించారు (Elderly Care).

ఈ కార్యక్రమంలో తెలుగు ఉపాధ్యాయులు భాగ్యలక్ష్మి, నిర్మల, మాధురి, ఆశ్రమ నిర్వాహకులు స్నేహ, సిబ్బంది తదితరులు పాల్గొన్నారు.